वाहतूक नियंत्रकांच्या केबिनचे मोठे नुकसान; अपघात विभागाला माहिती
पिंपरी-चिंचवड : पिंपळे गुरव बसस्थानकात विश्रांतीसाठी उभी असलेली पीएमपीएमएलची बस उतारावरून घसरून वाहतूक नियंत्रकांच्या केबिनला धडकल्याची घटना घडली. या अपघातात केबिनचे मोठ्या प्रमाणात नुकसान झाले असून, बसची वाट पाहत उभा असलेला एक प्रवासी जखमी झाला आहे.
मिळालेल्या माहितीनुसार, बस क्रमांक १०७/१ (C736) पिंपळे गुरव बसस्थानकात विश्रांतीसाठी उभी होती. यावेळी बस उतारावरून पुढे सरकत वाहतूक नियंत्रकांच्या केबिनला धडकली. या धडकेत केबिनचे नुकसान झाले. तसेच बसची प्रतीक्षा करत असलेला एक प्रवासी जखमी झाला.
जखमी प्रवाशाला बसचा वाहक औंध येथील जिल्हा रुग्णालयात उपचारासाठी घेऊन गेला. या घटनेची माहिती अपघात विभागाला कळविण्यात आली असून, पुढील कार्यवाहीसाठी घटनेचा अहवाल सादर करण्यात आला आहे.या अपघाताचे नेमके कारण स्पष्ट झालेले नाही.
