पिंपरी-चिंचवड : पिंपरी-चिंचवड महानगरपालिकेच्या वतीने आयोजित जिल्हास्तरीय स्केटिंग स्पर्धेत उल्लेखनीय कामगिरी करणाऱ्या खेळाडूंचा योगदान प्रतिष्ठानच्या वतीने सत्कार करण्यात आला. प्रतिष्ठानचे अध्यक्ष तथा नगरसेवक सुरेश शिवाजी भोईर यांच्या हस्ते यशस्वी खेळाडूंना पुष्पगुच्छ देऊन गौरविण्यात आले आणि त्यांच्या पुढील क्रीडा वाटचालीस शुभेच्छा देण्यात आल्या.
महापालिकेच्या वतीने ३ व ४ ऑक्टोबर २०२६ रोजी भोसरी येथील मारुती कंद स्केटिंग ग्राउंड आणि पीसीएनडीए ग्राउंड येथे जिल्हास्तरीय स्केटिंग स्पर्धेचे आयोजन करण्यात आले होते. या स्पर्धेत विविध शाळांतील विद्यार्थ्यांनी सहभाग घेतला.
अवनीश भोईरची दोन कांस्य पदके
प्रोफेशनल इनलाइन स्केटिंगच्या १७ वर्षांखालील गटात कु. अवनीश राहुल भोईर याने उत्कृष्ट कामगिरी करत दोन कांस्यपदकांची कमाई केली.
आयुष सायकरची चार रौप्य पदकांना गवसणी
रावेत येथील एस. बी. पाटील महाविद्यालयात बारावी विज्ञान शाखेत शिक्षण घेणाऱ्या कु. आयुष राकेश सायकर याने प्रोफेशनल इनलाइन स्केटिंगच्या १९ वर्षांखालील गटात उल्लेखनीय कामगिरी करत द्वितीय स्थानासह चार रौप्यपदके पटकावली.
या दोन्ही खेळाडूंच्या यशाबद्दल पिंपरी-चिंचवड स्केटिंग असोसिएशनचे अध्यक्ष अशोक गुंजाळ यांनी त्यांचे अभिनंदन केले आणि पुढील वाटचालीस शुभेच्छा दिल्या. तसेच नगरसेवक सुरेश शिवाजी भोईर यांनी खेळाडूंचा पुष्पगुच्छ देऊन सत्कार करत त्यांच्या यशाचे कौतुक केले.
खेळाडूंना प्रोत्साहन, क्रीडा क्षेत्राला बळ
योगदान प्रतिष्ठानच्या या उपक्रमातून शहरातील गुणवंत खेळाडूंना प्रोत्साहन देण्याचा आणि त्यांच्या यशाचा गौरव करण्याचा प्रयत्न करण्यात आला. खेळाडूंनी भविष्यातही अशीच चमकदार कामगिरी करून शहराचा नावलौकिक वाढवावा, अशा शुभेच्छा यावेळी देण्यात आल्या.
