सरसंघचालकांच्या हस्ते ‘ज्ञानरंग : ज्ञानेश्वरी’ ॲपचे लोकार्पण
मुंबई दिं.०३ ऑक्टोबर.….ज्ञानेश्वरी आपल्याला जगाकडे पाहण्याचे आणि जीवन समजून घेण्याचे ज्ञान देते. काळाचा संदर्भ बदलला, तरी हे ज्ञान आणि त्यातून आलेली संस्कृती टिकून राहते. ज्ञानेश्वरी काल, आज आणि उद्याही दिशादर्शक आहे असे प्रतिपादन प. पू. सरसंघचालक डॉ. मोहन भागवत यांनी केले. प्रत्येकाने ज्ञानेश्वरीतील किमान एक तरी ओवी अनुभवावी, असे आवाहन ही त्यांनी केले. संत ज्ञानेश्वर महाराजांच्या ७५०व्या जयंती वर्षाचे औचित्य साधून व्हॅल्युएबल ग्रुप प्रस्तुत आणि मेराक इव्हेंट्स आयोजित ‘ज्ञानरंग : माऊलींच्या ओव्यांचा उत्सव’ हा सोहळा शुक्रवारी प्रभादेवी येथील रवींद्र नाट्यमंदिरात उत्साहात पार पडला. यावेळी मोहन जी बोलत होते.मोहन जी यांच्या हस्ते ‘ज्ञानरंग : ज्ञानेश्वरी’ या विशेष मोबाइल ॲपचे याप्रसंगी लोकार्पण करण्यात आले.
यावेळी मोहन जी म्हणाले की, जगाचे जीवन शाश्वत आहे आणि जगाकडे कसे पाहावे, जीवन कसे समजून घ्यावे, हे ज्ञान आपल्याला शिकवते. हे ज्ञान सर्वत्र एकच आहे. प्रत्येक कालखंडात महापुरुषांनी या ज्ञानाची आपल्या काळाच्या संदर्भात मांडणी केली. काळ बदलला, परिस्थिती बदलली, तरी ज्ञानाचे मूळ स्वरूप आणि त्यातून निर्माण झालेली संस्कृती टिकून राहिली आहे.
परकीय आक्रमणांच्या काळात भागवत भक्तीच्या आधारावर भारतीय समाज टिकून राहिला आणि वृद्धिंगत झाला. असे सांगून मोहन जी म्हणाले की, समाजातील प्रत्येक घटकापर्यंत हे ज्ञान पोहोचले पाहिजे. आज जगाला मार्ग दाखवण्याची जबाबदारी भारताची आहे. ज्ञानेश्वरी हा भारताच्या ज्ञानपरंपरेतील अमूल्य ठेवा असून त्याला नव्या पिढीपर्यंत आणि जगभरातील जिज्ञासूंपर्यंत पोहोचविणे आवश्यक आहे असे ही त्यांनी नमूद केले.
आजच्या आधुनिक माध्यमांचा उपयोग करून हा ठेवा नव्या पिढीपर्यंत पोहोचावा, या भावनेतून ‘ज्ञानरंग : ज्ञानेश्वरी’ ॲप साकारण्यात आले आहे. भक्ती, ज्ञान आणि आधुनिक तंत्रज्ञान यांचा सुंदर संगम या उपक्रमातून साधला गेला आहे.या ॲपच्या माध्यमातून माऊलींच्या ओव्या रोजच्या जीवनात ऐकता, वाचता आणि समजून घेता येणार आहेत. ओवी ऐकतानाच तिचे शब्दागणिक वाचन करता येणार आहे.
हे ॲप आजपासून Google Play Store आणि Apple App Store वर सर्वांसाठी विनामूल्य उपलब्ध आहे. या ॲपची संकल्पना व्हॅल्युएबल ग्रुपचे व्यवस्थापकीय संचालक अमेय हेटे यांची आहे.
‘संपूर्ण ज्ञानेश्वरी श्रवण’ मालिकेचा शुभारंभ
याच सोहळ्यात सरसंघचालक डॉ. मोहन भागवत यांच्या हस्ते श्रीमद्भगवद्गीतेच्या श्लोकांसह ‘संपूर्ण ज्ञानेश्वरी श्रवण’ ही मालिका YouTube वर प्रसारित करण्यात आली. आजच्या धावपळीच्या जीवनात ज्यांना ज्ञानेश्वरीचे वाचन करणे शक्य होत नाही, त्यांना ती सहजपणे ऐकता यावी, हा या उपक्रमामागील मुख्य उद्देश आहे.
या उपक्रमाची संकल्पना तसेच ज्ञानेश्वरीचे वाचन रेणुका देशकर यांनी केले असून श्रीमद्भगवद्गीतेचे वाचन श्रीनिवास वर्णेकर यांनी केले आहे.
‘ज्ञानरंग : ज्ञानेश्वरी’ ॲपच्या अधिकृत लोकार्पण सोहळ्यापूर्वी माऊली ज्ञानेश्वरांच्या अलौकिक रचनांवर आधारित मंत्रमुग्ध करणाऱ्या सांगीतिक कार्यक्रमाचे आयोजन करण्यात आले होते. सुप्रसिद्ध गायक प्रथमेश लघाटे, मुग्धा वैशंपायन आणि केतकी चैतन्य यांनी संत ज्ञानेश्वरांच्या विविध ओव्या आणि संगीत रचना सादर करून उपस्थितांना मंत्रमुग्ध केले.
ज्येष्ठ निरूपणकार डॉ. संजय उपाध्ये यांनी माऊलींच्या साहित्यावर अभ्यासपूर्ण निरूपण केले. सूत्रसंचालन मिलिंद कुलकर्णी यांनी केले.
