निघोजे-तळवडे ब्रिज रोडवरील घटना; सीसीटीव्हीच्या तांत्रिक विश्लेषणातून आरोपींचा शोध
पिंपरी : रिक्षातून प्रवास करणाऱ्या प्रवाशाला कोयत्याचा धाक दाखवून त्याच्याकडील ११ हजार ४७० रुपयांची रोकड जबरदस्तीने लुटणाऱ्या टोळीला दक्षिण महाळुंगे एमआयडीसी पोलिसांच्या तपास पथकाने अवघ्या २४ तासांत जेरबंद केले. पोलिसांनी दोन आरोपींना अटक केली असून, एका विधी संघर्षग्रस्त बालकाला ताब्यात घेऊन बाल न्यायमंडळासमोर हजर केले आहे.
अजय चिंतामन देसलेपाटील (वय २९) हे २८ सप्टेंबर रोजी रात्री दहाच्या सुमारास निघोजे-तळवडे ब्रिज रोडवरून जात असताना एमएआरजे टेक्ने प्लास्ट कंपनीसमोर एका रिक्षाचालकाने त्यांना थांबविले. रिक्षाचालक व त्याच्या दोन साथीदारांनी संगनमत करून देसलेपाटील यांच्या पॅन्ट व शर्टच्या खिशातील ११ हजार ४७० रुपयांची रोकड कोयत्याचा धाक दाखवून जबरदस्तीने लुटली.
या प्रकरणी दक्षिण महाळुंगे एमआयडीसी पोलीस ठाण्यात गुन्हा रजि. क्र. ७८७/२०२६ अन्वये भारतीय न्याय संहिता कलम ३०९(४), ३(५) तसेच आर्म्स अॅक्ट कलम ४(२५) नुसार गुन्हा दाखल करण्यात आला.
गुन्ह्याचे गांभीर्य लक्षात घेऊन वरिष्ठ अधिकाऱ्यांनी विविध तपास पथके तयार करून आरोपींचा शोध सुरू केला. आरोपींबाबत कोणताही ठोस सुगावा नसताना पोलिसांनी परिसरातील सीसीटीव्ही फुटेजचे तांत्रिक विश्लेषण केले. त्यातून संबंधित रिक्षाचा क्रमांक मिळवण्यात पोलिसांना यश आले. त्यानंतर तपासाची चक्रे वेगाने फिरवत पोलिसांनी अमन ऊर्फ शाहबाज समीर शेख (वय २६) आणि शेखर बापू माने (वय २१) यांना ताब्यात घेतले. चौकशीत त्यांचा गुन्ह्यात सहभाग निष्पन्न झाल्यानंतर दोघांना अटक करण्यात आली. एका विधी संघर्षग्रस्त बालकाला ताब्यात घेऊन बाल न्यायमंडळासमोर हजर करण्यात आले.
पोलिसांच्या माहितीनुसार, आरोपी अमन ऊर्फ शाहबाज समीर शेख हा निगडी पोलीस ठाण्यातील मोक्का प्रकरणात सुमारे १५ दिवसांपूर्वीच जामिनावर कारागृहातून बाहेर आला होता. त्याच्यावर विविध पोलीस ठाण्यांमध्ये अनेक गुन्हे दाखल आहेत. तसेच आरोपी शेखर माने याच्यावरही जबरी चोरी व मारहाणीचे गुन्हे दाखल असल्याची माहिती पोलिसांनी दिली.
ही कारवाई पोलीस आयुक्त विनय कुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त (गुन्हे) सारंग आवाड, अपर पोलीस आयुक्त (प्रादेशिक) डॉ. बसवराज तेली, पोलीस उपायुक्त, परिमंडळ-४ श्वेता खेडकर आणि सहायक पोलीस आयुक्त प्रिया डमाळे यांच्या मार्गदर्शनाखाली करण्यात आली.
वरिष्ठ पोलीस निरीक्षक विजय ढमाळ, पोलीस निरीक्षक (गुन्हे) अनिल देवड, पोलीस उपनिरीक्षक संतोष जायभाये, पोलीस हवालदार चेतन सावंत, पोलीस शिपाई राजेंद्र खेडकर, प्रविण बांबळे, शिवाजी मरकड, राजेश गिरी, आकाश घाडगे आणि राजकुमार हणमंते यांच्या पथकाने ही कारवाई केली. दाखल गुन्ह्याचा पुढील तपास पोलीस उपनिरीक्षक शरद पिंजारी करीत आहेत.
