वाकडमध्ये तरुणाचा खून; तिघांना अटक

बहिणीची छेडछाड केल्याच्या संशयातून मारहाण केल्याची पोलिसांत नोंद

वाकड, दि. २१ सप्टेंबर : वाकड परिसरातील कावेरीनगर भाजी मंडईसमोरील मोकळ्या जागेत कचरा टाकण्याच्या ठिकाणी एका ३५ वर्षीय तरुणाचा खून झाल्याची घटना उघडकीस आली आहे. या प्रकरणी वाकड पोलिसांनी तिघांना अटक केली आहे. हा प्रकार १९ सप्टेंबर रोजी रात्री साडेअकरापूर्वी घडल्याची नोंद पोलिसांत करण्यात आली आहे.

पोलिसांनी दिलेल्या माहितीनुसार, मृताचे नाव मारोती बाळासाहेब बनसोडे (वय ३५, रा. बोधेगाव, ता. परळी, जि. बीड; सध्या रा. बौद्धनगर, दत्तनगर, चिंचवड) असे आहे. संशयित आरोपीच्या बहिणीची छेडछाड केल्याच्या कारणावरून मारोती बनसोडे याला मारहाण करण्यात आल्याचा आरोप आहे.

नोंदीनुसार, आरोपींनी मारोती याच्या तोंडावर, गळ्यावर, हनुवटीवर तसेच शरीराच्या अन्य भागांवर मारहाण करून त्याला गंभीर जखमी केले. या मारहाणीत त्याचा मृत्यू झाल्याचे फिर्यादीत नमूद करण्यात आले आहे.

या प्रकरणी अमित दशरथ साळुंखे (वय २६), किशोर सुभाष वाघमारे (वय ३९) आणि भारत संजय पवार (वय २३) या तिघांना पोलिसांनी अटक केली आहे.

वाकड पोलीस ठाण्यात गुन्हा रजिस्टर क्रमांक ५९५/२०२६ अन्वये भारतीय न्याय संहितेच्या कलम १०३(१), ३(५) तसेच भादंवि कलम ३०२ अन्वये गुन्हा दाखल करण्यात आला आहे. पुढील तपास वाकड पोलीस करीत आहेत.