महापालिकेच्या पाणीपुरवठा विभागात नोकरी लावण्याच्या नावाखाली पाच जणांची फसवणूक; रेकॉर्डवरील आरोपीला खंडणीविरोधी पथकाने ठोकल्या बेड्या
पिंपरी चिंचवड, दि. १३ सप्टेंबर २०२६ : पिंपरी चिंचवड महानगरपालिकेच्या पाणीपुरवठा विभागात नोकरी लावून देण्याचे आमिष दाखवून बनावट कागदपत्रे व नियुक्तीपत्रे तयार करत अनेकांची आर्थिक फसवणूक करणाऱ्या रेकॉर्डवरील आरोपीला खंडणीविरोधी पथक, गुन्हे शाखेने शिताफीने ताब्यात घेतले. प्रतीक राजेश धायींजे (वय २६, रा. चक्रपाणी वसाहत, शास्त्री चौकाजवळ, आळंदी रोड, भोसरी, ता. हवेली, जि. पुणे; मूळ रा. अकलूज, जि. सोलापूर) असे ताब्यात घेण्यात आलेल्या आरोपीचे नाव आहे.
खंडणीविरोधी पथकाला दि. १२ सप्टेंबर रोजी मिळालेल्या गोपनीय माहितीनुसार, प्रतीक धायींजे हा अनेकांना नोकरी लावण्याचे आमिष दाखवून फसवणूक करत असल्याचे समोर आले. पथकाने फसवणूक झालेल्या व्यक्तींशी संपर्क साधून माहिती घेतली असता, आरोपीने पाच जणांना पिंपरी चिंचवड महानगरपालिकेच्या पाणीपुरवठा विभागात नोकरी लावण्याचे सांगून बनावट कागदपत्रे व नियुक्तीपत्रे तयार केली आणि तब्बल १ लाख १४ हजार ११२ रुपयांची आर्थिक फसवणूक केल्याचे उघड झाले.
यानंतर आरोपीचा शोध घेत असताना तो शिवरोड, धावडे वस्ती, भोसरी परिसरात असल्याची गोपनीय माहिती पोलिसांना मिळाली. पोलिसांनी सापळा रचून त्याला शिताफीने ताब्यात घेतले.
आरोपीची अधिक चौकशी केली असता, त्याच्याविरुद्ध यापूर्वीही फसवणुकीचा गुन्हा दाखल असल्याचे समोर आले. म्हाडामध्ये स्वस्त घर मिळवून देतो, असे आमिष दाखवून अनेकांची फसवणूक करत त्याने २२ लाख ४१ हजार ७६० रुपये उकळल्याचे पोलिस तपासात यापूर्वी निष्पन्न झाले आहे. याप्रकरणी भोसरी पोलीस ठाण्यात गुन्हा रजिस्टर क्रमांक ३३/२०२५ अन्वये भारतीय न्याय संहितेच्या कलम ३१८(४), ३३६(३), ३३८, ३४०(२) प्रमाणे गुन्हा दाखल आहे.
दरम्यान, पाणीपुरवठा विभागातील नोकरीच्या आमिषाने फसवणूक केल्याप्रकरणी फिर्यादीने भोसरी पोलीस ठाण्यात दिलेल्या तक्रारीवरून गुन्हा रजिस्टर क्रमांक ५६६/२०२६, भारतीय न्याय संहिता कलम ३१८(२), ३१८(४) अन्वये दि. १३ सप्टेंबर २०२६ रोजी गुन्हा दाखल करण्यात आला आहे.
आरोपी प्रतीक धायींजे याला पुढील कायदेशीर कारवाईसाठी भोसरी पोलीस ठाण्याच्या ताब्यात देण्यात आले असून, गुन्ह्याचा अधिक तपास सुरू आहे.
ही कारवाई मा. पोलीस आयुक्त श्री. विनय कुमार चौबे, मा. सह पोलीस आयुक्त डॉ. शशिकांत महावरकर, मा. अपर पोलीस आयुक्त श्री. सारंग आव्हाड, मा. पोलीस उप-आयुक्त (गुन्हे) श्री. रोहिदास पवार आणि मा. सहायक पोलीस आयुक्त (गुन्हे-२) श्री. सचिन कदम यांच्या मार्गदर्शनाखाली करण्यात आली.
खंडणीविरोधी पथकाचे वरिष्ठ पोलीस निरीक्षक राजेंद्र पाटील तसेच पोलीस हवालदार प्रदीप पोटे, प्रदीप गोडांवे, किरण जाधव आणि किशोर कांबळे यांच्या पथकाने ही उल्लेखनीय कारवाई केली.
नागरिकांना पोलिसांचे आवाहन
पिंपरी चिंचवड पोलीस आयुक्तालयाच्या वतीने नागरिकांना आवाहन करण्यात आले आहे की, नोकरी, स्वस्त घर, सरकारी योजना अथवा अन्य कोणत्याही आमिषाला बळी पडू नये. कोणत्याही व्यक्तीने पैसे घेऊन नोकरी लावून देण्याचे आश्वासन दिल्यास त्याची सत्यता तपासावी आणि संशयास्पद प्रकार आढळल्यास तातडीने पोलिसांशी संपर्क साधावा.
