बावधन पोलिसांची धडाकेबाज कारवाई; विजापूरच्या शेतातून आरोपी ताब्यात
पुणे बावधन: पत्नीच्या चारित्र्यावर संशय घेत धारदार शस्त्राने तिचा गळा चिरून खून करून पसार झालेल्या आरोपी पतीला बावधन पोलिसांनी अवघ्या २४ तासांच्या आत कर्नाटकातील विजापूर येथून अटक केली. परशुराम भागप्पा हरिजन (वय ४८) असे अटक करण्यात आलेल्या आरोपीचे नाव आहे. निलाबाई परशुराम हरिजन (वय ४२) असे खून झालेल्या महिलेचे नाव आहे.
बावधन पोलीस ठाण्याच्या हद्दीतील तोडकर वस्ती, भुगाव येथे हा धक्कादायक प्रकार घडला. पोलिसांनी दिलेल्या माहितीनुसार, परशुराम हरिजन याने पत्नी निलाबाई यांच्या चारित्र्यावर संशय घेतला. त्यातून त्याने कोणत्यातरी धारदार शस्त्राने निलाबाई यांचा गळा चिरून त्यांचा खून केला आणि घटनास्थळावरून फरार झाला.
या प्रकरणी बावधन पोलीस ठाण्यात गुन्हा रजिस्टर क्रमांक ४०१/२०२६ अन्वये भारतीय न्याय संहिता कलम १०३(१) नुसार खुनाचा गुन्हा दाखल करण्यात आला.
खून केल्यानंतर आरोपी फरार झाल्याने त्याचा शोध घेण्याचे मोठे आव्हान पोलिसांसमोर होते. आरोपीने खुनासाठी वापरलेले धारदार शस्त्रही कोठेतरी लपविल्याचा संशय होता. पोलिसांनी आरोपीच्या मोबाईलचे तांत्रिक विश्लेषण करून त्याच्या हालचालींचा माग काढला.
त्यानंतर तपास पथकाच्या दोन स्वतंत्र टीम तयार करून त्यांना दोन राज्यांमध्ये रवाना करण्यात आले. तांत्रिक तपासातून आरोपी कर्नाटकातील विजापूर येथे असल्याचे निष्पन्न झाले. आरोपी एका शेतात लपून बसल्याची माहिती मिळताच पोलिसांनी स्थानिक पोलीस व नागरिकांच्या मदतीने कारवाई करून परशुराम हरिजन याला ताब्यात घेतले.
या धडाकेबाज कारवाईमुळे खून केल्यानंतर राज्याबाहेर पसार झालेल्या आरोपीला २४ तासांच्या आत बेड्या ठोकण्यात बावधन पोलिसांना यश आले.
ही कारवाई पोलीस आयुक्त विनयकुमार चौबे, पोलीस सहआयुक्त सारंग आवाड, अपर पोलीस आयुक्त (गुन्हे) बसवराज तेली, अपर पोलीस आयुक्त (प्रादेशिक विभाग) प्रदीप जाधव, पोलीस उपायुक्त परिमंडळ-२ विठ्ठल कुबडे तसेच हिंजवडी विभागाचे सहाय्यक पोलीस आयुक्त यांच्या मार्गदर्शनाखाली करण्यात आली.
बावधन पोलीस ठाण्याचे वरिष्ठ पोलीस निरीक्षक अरविंद पवार, पोलीस निरीक्षक (गुन्हे) परवेज शिकलगार, सहाय्यक पोलीस निरीक्षक चेतन थोरबोले, पोलीस उपनिरीक्षक राजेंद्र काळे, पोलीस शिपाई पाटील, पोलीस शिपाई डंगारे, तसेच तपास पथकातील अधिकारी व अंमलदारांनी ही कारवाई केली.
