पिंपरी, दि. २ सप्टेंबर २०२६ : पिंपरी-चिंचवड शहरातील पायाभूत सुविधा, पाणीपुरवठा, आरोग्य सेवा, रस्ते, बीआरटीएस, डिजिटल सुरक्षा आणि प्रशासकीय सुविधा अधिक सक्षम करण्यासाठी महापालिकेच्या स्थायी समितीच्या सभेत विविध महत्त्वपूर्ण विकासकामांना मंजुरी देण्यात आली. स्थायी समिती सभापती अभिषेक बारणे यांच्या अध्यक्षतेखाली ही सभा पार पडली.
महापालिकेच्या संगणक यंत्रणेची सायबर सुरक्षा मजबूत करण्यासाठी ३ हजार अँटी-व्हायरस प्रणाली खरेदी करण्यास तसेच तीन वर्षांसाठी सपोर्ट स्टाफ नियुक्त करण्यास मान्यता देण्यात आली. यामुळे महापालिकेच्या विविध विभागांतील संगणकीय प्रणालींची सुरक्षा व तांत्रिक देखभाल अधिक प्रभावी होणार आहे.
शहरातील महत्त्वाच्या रस्ते व बीआरटीएस मार्गांच्या देखभाल-दुरुस्तीच्या कामांनाही मंजुरी देण्यात आली. नाशिक फाटा उड्डाणपुलाची स्थापत्यविषयक दुरुस्ती, नाशिक फाटा ते वाकड कॉरिडॉर क्रमांक ३ रस्त्याची देखभाल-दुरुस्ती तसेच औंध-रावेत बीआरटीएस मार्गावरील बसथांबे व स्थापत्य सुविधांचे मानांकन वाढविण्यासाठी आवश्यक कामे करण्यात येणार आहेत.
नव्याने स्थापन झालेल्या ‘लोहगड’ क्षेत्रीय कार्यालयासाठी आवश्यक फर्निचर व स्थापत्य कामांना मंजुरी देण्यात आली. प्रभाग समिती सभागृह, अध्यक्ष कक्ष, क्षेत्रीय अधिकारी, लेखा विभाग, कॅश काउंटर तसेच स्थापत्य व विद्युत विभागासाठी आवश्यक कार्यालयीन सुविधा उपलब्ध करून देण्यात येणार आहेत.
महापालिका रुग्णालयांमध्ये महात्मा ज्योतिराव फुले जनआरोग्य योजनेंतर्गत उपचार घेणाऱ्या रुग्णांसाठी आवश्यक ऑर्थोपेडिक इम्प्लांट्स खरेदी करण्यास मंजुरी देण्यात आली. तसेच कान, नाक व घसा विभागातील Debrider Otology Microdrill and Steps Drill System या उपकरणाच्या पुढील एक वर्षाच्या सर्वसमावेशक देखभाल-दुरुस्तीला मान्यता देण्यात आली.
पाणीपुरवठा व्यवस्थेला विशेष प्राधान्य देत शहरातील विविध पाण्याच्या टाक्या, जलक्षेत्र, जलवाहिन्या व वितरण व्यवस्थांच्या परिचालन, देखभाल व दुरुस्तीच्या कामांना मंजुरी देण्यात आली. बोपखेल, दिघी, पिंपळे निलख, थेरगाव, वाकड-भगवाननगर-काळाखडक, श्रीनगर, पिंपरीनगर, पिंपरी गाव, पाटीलनगर-चिखली, जाधववाडी-कुदळवाडी आदी भागांचा यात समावेश आहे. आवश्यक मजूर, वाहनचालक व टँकर व्यवस्था उपलब्ध करून देण्यासही मान्यता देण्यात आली.
पिंपळे सौदागर येथील शिवार चौक ते गोविंद गार्डन चौक रस्त्याच्या विकासासोबतच वाढत्या लोकसंख्येचा विचार करून रस्त्याच्या दोन्ही बाजूंना अधिक क्षमतेच्या डी.आय. जलवाहिन्या टाकण्याच्या सुधारित प्रस्तावास मंजुरी देण्यात आली.
मोशी-बोऱ्हाडेवाडी येथील छत्रपती संभाजी महाराज पुतळा परिसरासाठी उच्चदाब वीजपुरवठा उपलब्ध करून देण्यासही मान्यता देण्यात आली. परिसरात फसाड लाइटिंग, सीसीटीव्ही, अग्निशमन यंत्रणा आणि आकर्षक एलईडी प्रकाश व्यवस्था उभारण्यात येणार आहे.
प्रभाग क्रमांक १० मधील एमआयडीसी परिसरातील रस्ते आधुनिक पद्धतीने विकसित करण्यासाठी QCBS पद्धतीने प्रकल्प व्यवस्थापन सल्लागार नियुक्त करण्यास मंजुरी देण्यात आली. तसेच उद्यान विभागातील मनुष्यबळाची कमतरता लक्षात घेऊन पाच उद्यान अधिकारी व तीन सहाय्यक उद्यान अधिकाऱ्यांना सहा महिन्यांसाठी मानधन तत्त्वावर पुनर्नियुक्त करण्यास मान्यता देण्यात आली.
याशिवाय प्रभाग क्रमांक १२ मधील गणेशोत्सव विसर्जन-संकलन व्यवस्था, विविध महापालिका कार्यक्रमांसाठी मंडप व्यवस्था तसेच साहित्यरत्न लोकशाहीर अण्णा भाऊ साठे विचार प्रबोधन पर्व २०२६ सात दिवस आयोजित करण्यास मंजुरी देण्यात आली.
“नियमित पाणीपुरवठा, सक्षम रस्ते व बीआरटीएस सुविधा, दर्जेदार आरोग्य सेवा आणि डिजिटल सुरक्षा यांना प्राधान्य देण्यात येत आहे. प्रशासकीय कार्यक्षमता, सेवांची गुणवत्ता आणि नागरिकहित या बाबींना केंद्रस्थानी ठेवून शहराच्या सर्वांगीण विकासासाठी स्थायी समिती सातत्याने कार्यरत राहील.”
…… अभिषेक बारणे. स्थायी समिती अध्यक्ष.पिं.चिं.
