पुणे,निगडी प्रतिनिधी : पिंपरी-चिंचवड शहरातील निगडी प्राधिकरण परिसरात भूमिगत डक्टमध्ये काम करत असताना श्वास गुदमरून दोन मजुरांचा दुर्दैवी मृत्यू झाल्याची घटना बुधवारी (दि. २६) रात्री उघडकीस आली. रात्री सुमारे ११.४५ वाजण्याच्या सुमारास ही घटना समोर आली. लोकमान्य रुग्णालयाजवळ, निर्मल व्हिला बंगल्यासमोर असलेल्या भूमिगत डक्टमध्ये ही दुर्घटना घडली.
या दुर्घटनेत मनोज बाबुराव शिंदे (वय २६) आणि अमोल अशोक शिंदे (वय १९) या दोघांचा मृत्यू झाला. दोघेही मूळचे हिंगोली जिल्ह्यातील औंढा तालुक्यातील सिद्धेश्वर गावचे रहिवासी असल्याची माहिती समोर आली आहे.
प्राथमिक माहितीनुसार, डक्टमध्ये ऑक्सिजनची कमतरता किंवा विषारी वायू निर्माण झाल्यामुळे दोन्ही मजुरांचा श्वास गुदमरला असावा, असा पोलिसांचा प्राथमिक अंदाज आहे. घटनेची माहिती मिळताच संबंधित यंत्रणांनी घटनास्थळी धाव घेतली. पोलिसांकडून या दुर्घटनेचा सखोल तपास सुरू आहे.
वर्षभरात एकाच डक्टमध्ये पाच बळी
दरम्यान, या घटनेमुळे भूमिगत डक्टमधील मजुरांच्या सुरक्षेचा गंभीर प्रश्न पुन्हा ऐरणीवर आला आहे. विशेष म्हणजे, साधारण वर्षभरापूर्वी १५ ऑगस्ट २०२५ रोजी याच डक्टमध्ये केबलचे काम करताना विषारी वायूमुळे गुदमरून तीन कामगारांचा मृत्यू झाला होता. त्यानंतरही त्याच ठिकाणी पुन्हा दोन मजुरांचा बळी गेल्याने एकाच भूमिगत डक्टमध्ये आतापर्यंत पाच जणांचा मृत्यू झाल्याचे समोर आले आहे.
वारंवार जीवघेण्या दुर्घटना घडूनही सुरक्षेच्या पुरेशा उपाययोजना करण्यात आल्या नसल्याचा आरोप स्थानिक नागरिकांकडून केला जात आहे. डक्टमध्ये काम करणाऱ्या मजुरांना ऑक्सिजनची उपलब्धता, विषारी वायूची तपासणी, आवश्यक सुरक्षा साधने तसेच आपत्कालीन बचाव यंत्रणा उपलब्ध करून देण्यात आली होती का, याची चौकशी करण्याची मागणी होत आहे.
एकाच ठिकाणी वर्षभराच्या कालावधीत पाच जणांचा जीव गेल्याने संबंधित प्रशासन आणि ठेकेदाराच्या कार्यपद्धतीवर गंभीर प्रश्नचिन्ह उपस्थित झाले आहे. भविष्यात अशा दुर्घटना टाळण्यासाठी जबाबदारी निश्चित करून कठोर सुरक्षा उपाययोजना करण्याची मागणी नागरिकांकडून होत आहे.
