मराठी पत्रकार संघाच्या पिंपरी-चिंचवड शहरातील नवनिर्वाचित पदाधिकारी व सदस्यांचा सत्कार
पिंपरी : पत्रकार हा समाजाचा अत्यंत महत्त्वाचा घटक आहे. आपल्या परिसरातील चांगल्या-वाईट घटना, समस्या आणि घडामोडी समाजापर्यंत पोहोचविण्यासाठी पत्रकार प्रतिकूल परिस्थितीतही आपले कर्तव्य बजावत असतो. हे काम करताना पत्रकार केवळ आपले कर्तव्य पार पाडत असल्याच्या भावनेने कार्यरत असतो. त्यामुळे समाजाच्या या महत्त्वाच्या घटकासाठी सर्वतोपरी मदत करण्याबरोबरच पत्रकार आणि त्यांच्या कुटुंबीयांसाठी आरोग्य कवच उपलब्ध करून देण्यासाठी प्रयत्न करणार असल्याचे पिंपरी-चिंचवड महापालिकेचे विरोधी पक्षनेते भाऊसाहेब भोईर यांनी जाहीर केले.
मराठी पत्रकार संघाच्या पिंपरी-चिंचवड शहरातील नवनिर्वाचित पदाधिकारी व सदस्यांचा सत्कार समारंभ महापालिकेतील भा. वि. कांबळे पत्रकार कक्षात उत्साहात पार पडला. यावेळी विरोधी पक्षनेते भाऊसाहेब भोईर, मराठी पत्रकार संघाचे प्रदेश उपाध्यक्ष विवेक इनामदार, पिंपरी-चिंचवड शहराध्यक्ष रोहित खर्गे, महिला फोरम अध्यक्षा अर्चना मेंगडे, कार्याध्यक्ष दादाराव आढाव आदी मान्यवर उपस्थित होते.
“पत्रकार हा समाजाचा आरसा आहे. समाजातील विविध प्रश्न प्रशासन आणि लोकप्रतिनिधींपर्यंत पोहोचविण्याचे तसेच प्रशासनाच्या कामाची माहिती नागरिकांपर्यंत पोहोचविण्याचे महत्त्वाचे काम पत्रकार करतात. अनेकदा प्रतिकूल परिस्थितीतही पत्रकार आपले कर्तव्य पार पाडतात. त्यामुळे पत्रकारांच्या अडचणी सोडविण्यासाठी आणि त्यांच्या कुटुंबीयांना आरोग्याची सुरक्षितता मिळावी यासाठी आपण सर्वतोपरी सहकार्य करू.”
……. भाऊसाहेब भोईर. विरोधी पक्षनेते,पिंपरी चिंचवड.
यावेळी मराठी पत्रकार संघाचे प्रदेश उपाध्यक्ष विवेक इनामदार यांनी संघाच्या आगामी उपक्रमांची माहिती दिली. पत्रकारांना हेल्मेट वाटप, आरोग्य विमा, पत्रकारांसाठी परवडणारी व हक्काची घरे तसेच अन्य कल्याणकारी योजनांसाठी संघाच्या माध्यमातून प्रयत्न सुरू असल्याचे त्यांनी सांगितले.
येत्या काही दिवसांत मराठी पत्रकार संघातील पत्रकार सदस्यांना हेल्मेटचे वाटप करण्यात येणार असल्याची माहिती शहराध्यक्ष रोहित खर्गे यांनी दिली. पत्रकारांच्या हितासाठी विविध उपक्रम राबवून आगामी काळात मराठी पत्रकार संघाच्या लौकिकात भर घालणारे काम करण्याचा संकल्प त्यांनी व्यक्त केला. सत्काराला उत्तर देताना त्यांनी संघाच्या सर्व पदाधिकारी व सदस्यांच्या सहकार्याने पत्रकारांच्या प्रश्नांसाठी सातत्याने प्रयत्न करण्याचे आश्वासन दिले.
कार्यक्रमाचे प्रास्तविक कार्याध्यक्ष दादाराव आढाव यांनी केले. संघांचे उपाध्यक्ष संतलाल यादव, सचिव बजरंग मासाळ, खजिनदार संतोष जाधव, संपर्क प्रमुख संतोष महामुनी, पत्रकार हल्ला विरोधी कृती समिती अध्यक्ष कालिंदर शेख, संदीप सोनार, श्रीधर जगताप, शफिक शेख, विवेक कुलकर्णी, नागेश खजूरगीकर, अजय कुलकर्णी, सीताराम मोरे, लीना माने, पूनम पाटील, राजश्री आतकरे, संगीता पाचंगे आदी पत्रकारांचा सत्कार करण्यात आला.
पत्रकारांच्या सुरक्षिततेबरोबरच त्यांच्या कुटुंबीयांच्या आरोग्याचा प्रश्नही महत्त्वाचा असून, आरोग्य विमा आणि इतर कल्याणकारी योजनांच्या माध्यमातून पत्रकारांना अधिक सुरक्षितता देण्यासाठी संघाच्या वतीने प्रयत्न केले जाणार असल्याचे यावेळी पदाधिकाऱ्यांनी सांगितले.
कार्यक्रमाचे सूत्रसंचालन विवेक इनामदार यांनी केले, तर आभार संतोष महामुनी यांनी मानले.
