मराठी पत्रकार संघाच्या नवनिर्वाचित पदाधिकाऱ्यांच्या सत्कार समारंभात आमदार जगताप यांचे आश्वासन
पिंपरी : पिंपरी-चिंचवड शहर तसेच पुणे व पुणे जिल्हा मराठी पत्रकार संघाच्या नवनिर्वाचित पदाधिकारी व कार्यकारिणी सदस्यांचा सत्कार समारंभ चिंचवड विधानसभा मतदारसंघाचे आमदार शंकर जगताप यांच्या हस्ते पिंपळे गुरव येथे उत्साहात पार पडला.
यावेळी पिंपरी-चिंचवड महानगरपालिका स्थायी समितीचे अध्यक्ष अभिजित बारणे, आमदार शंकर जगताप, मराठी पत्रकार संघाचे प्रदेशाध्यक्ष किरण जोशी, प्रदेश उपाध्यक्ष विवेक इनामदार, जिल्हा उपाध्यक्ष विजय गायकवाड, पिंपरी-चिंचवड शहराध्यक्ष रोहित खर्गे, महिला अध्यक्ष अर्चना मेंगडे आदी प्रमुख उपस्थित होते.
कार्याध्यक्ष दादाराव आढाव, सचिव बजरंग मासाळ, खजिनदार संतोष जाधव, संपर्कप्रमुख संतोष महामुनी, संदीप सोनार, शफिक शेख, विवेक कुलकर्णी, नागेश खजूरगीकर, सीताराम मोरे, लीना माने, पूनम पाटील, राजश्री आतकरे, संगीता पाचंगे आदी पत्रकार बांधवांचा यावेळी आमदार शंकर जगताप यांच्या हस्ते सत्कार करण्यात आला.
यावेळी प्रास्ताविक करताना प्रदेशाध्यक्ष किरण जोशी म्हणाले, “चिंचवड विधानसभा मतदारसंघाचे आमदार शंकर जगताप हे विकासासाठी झटणारे आणि संयमी लोकप्रतिनिधी म्हणून परिचित आहेत. पत्रकारांच्या समस्या जाणून घेऊन त्या सोडविण्यासाठी ते सातत्याने प्रयत्न करतात. जनतेची कामे घेऊन ते मुख्यमंत्री देवेंद्र फडणवीस यांच्याकडे जात असल्याचे मी अनेकदा पाहिले आहे.”
स्थायी समिती अध्यक्ष अभिजित बारणे यांच्याबाबत बोलताना जोशी म्हणाले की, चुकीच्या गोष्टी बाजूला ठेवून चांगल्या कामांना प्राधान्य देणारे सक्षम लोकप्रतिनिधी म्हणून त्यांची ओळख आहे.
दरम्यान, संघाच्या मुंबई येथील अधिवेशनात राज्याचे महसूल मंत्री चंद्रशेखर बावनकुळे यांनी पत्रकार भवनाबाबत दिलेल्या आश्वासनाची पत्राची प्रत आमदार शंकर जगताप यांच्याकडे सुपूर्द करण्यात आली. तसेच प्रस्तावित पत्रकार भवनाला स्वर्गीय आमदार लक्ष्मणभाऊ जगताप यांचे नाव देण्यात यावे, अशी अपेक्षाही यावेळी व्यक्त करण्यात आली.
यावेळी आमदार शंकर जगताप यांनी पत्रकार भवनाच्या मागणीबाबत सकारात्मक भूमिका व्यक्त केली. “पत्रकार संघाची मागणी पूर्ण करण्यासाठी निश्चितच मदत करण्यात येईल. जोपर्यंत पत्रकार भवन तयार होत नाही, तोपर्यंत स्वस्थ बसणार नाही,” असे आश्वासन त्यांनी दिले.
पत्रकार संघाची नवनिर्वाचित कार्यकारिणी सर्वसमावेशक असून प्रदेशाध्यक्ष किरण जोशी हे पिंपरी-चिंचवड शहराचे राज्यव्यापी प्रतिनिधित्व करत आहेत, ही शहरासाठी अभिमानाची बाब असल्याचेही आमदार जगताप यांनी सांगितले.
प्रदेश उपाध्यक्ष विवेक इनामदार यांनी संघाच्या आगामी उपक्रमांची माहिती दिली. यामध्ये पत्रकारांना हेल्मेट वाटप, आरोग्य विमा, पत्रकारांसाठी परवडणारी व हक्काची घरे तसेच विविध कल्याणकारी योजनांचा समावेश असल्याचे त्यांनी सांगितले.
कार्यक्रमाचे सूत्रसंचालन विवेक इनामदार यांनी केले, तर आभार शहराध्यक्ष रोहित खर्गे यांनी मानले.
