पिंपरी : पिंपरी-चिंचवड पोलिसांनी अमली पदार्थविरोधी कारवाईचा धडाका कायम ठेवत बावधन, हिंजवडी आणि सांगवी परिसरात केलेल्या स्वतंत्र कारवायांमध्ये मोठ्या प्रमाणात गांजा व चरस जप्त केला. या कारवायांमध्ये तिघांना अटक करण्यात आली असून, एकूण लाखो रुपयांचा मुद्देमाल पोलिसांनी ताब्यात घेतला आहे.
बावधनमध्ये हायड्रोपोनिक गांजा जप्त….
बावधन पोलिसांनी सुस-नांदे रोडवरील ब्लुरिफमेरा सोसायटीसमोर, कनुकी चायजवळ २१ ऑगस्ट रोजी पहाटे सव्वा एकच्या सुमारास कारवाई केली. यावेळी सचिनकुमार दयानंद प्रसाद (वय २३, रा. सुस) याच्याकडून १५२ ग्रॅम वजनाचा हायड्रोपोनिक गांजा जप्त करण्यात आला. या गांजाची किंमत सुमारे १५ लाख २० हजार रुपये आहे.
पोलिसांच्या तपासानुसार, आरोपी कुणाल रंजन याने विक्रीसाठी हा गांजा सचिनकुमार याच्याकडे दिला होता. या प्रकरणी सचिनकुमार याला अटक करण्यात आली असून, कुणाल रंजन याचाही तपास सुरू आहे. बावधन पोलिस ठाण्यात एनडीपीएस कायद्यान्वये गुन्हा दाखल करण्यात आला आहे.
हिंजवडीत गांजासह तरुणाला अटक…..
हिंजवडी पोलिसांनी २१ ऑगस्ट रोजी रात्री आठच्या सुमारास व्ही.टी.पी. बांधकाम साइटजवळ, महाळुंगेकडे जाणाऱ्या सार्वजनिक रस्त्यावर कारवाई केली. गणेश राजेंद्र पवार (वय २४, रा. माण, मुळशी) याला पोलिसांनी ताब्यात घेतले.
त्याच्याकडून गांजा आणि एक मोबाईल असा मुद्देमाल जप्त करण्यात आला. पोलिसांच्या नोंदीनुसार गांजाचे वजन ११० किलो असल्याचे नमूद करण्यात आले आहे. या प्रकरणी हिंजवडी पोलिस ठाण्यात एनडीपीएस कायद्यान्वये गुन्हा दाखल करण्यात आला असून, आरोपीला अटक करण्यात आली आहे.
सांगवीत चरस जप्त; मनाली-कसोल कनेक्शन उघड
सांगवी पोलिसांनी पिंपळे गुरव येथील शिवगणेश चौक, पगारे हॉस्पिटलसमोर २० ऑगस्ट रोजी सायंकाळी साडेसहाच्या सुमारास कारवाई केली. प्रथमेश ऊर्फ सनी राजेश खेरे (वय २५, रा. पिंपळे गुरव) याला अटक करून त्याच्याकडून १७८ ग्रॅम ३७० मिलीग्रॅम चरस जप्त करण्यात आला.
पोलिसांनी दिलेल्या माहितीनुसार, आरोपीकडून चरससह दोन मोबाईल आणि दुचाकी असा एकूण सुमारे २ लाख ४ हजार ५९२ रुपयांचा मुद्देमाल जप्त करण्यात आला आहे. चौकशीत हा चरस हिमाचल प्रदेशातील मनाली-कसोल परिसरातून विक्रीसाठी आणल्याची माहिती आरोपीने दिल्याचे पोलिसांनी नमूद केले आहे.
या प्रकरणात आरोपीने मित्रांसह मनाली-कसोल येथे जाऊन तेथून चरस आणल्याचे तपासात समोर आले आहे. पोलिसांनी या प्रकरणातील इतर संबंधित व्यक्तींचा शोध सुरू केला आहे.तीन्ही प्रकरणांचा पुढील तपास संबंधित पोलिस ठाण्यांकडून सुरू आहे. अमली पदार्थांच्या विक्री व वाहतुकीविरोधात पोलिसांनी कारवाई अधिक तीव्र केली आहे.
