तळेगाव दाभाडे प्रतिनिधी : दारू पिण्यासाठी उसने पैसे देण्यास नकार दिल्याच्या कारणावरून एका व्यक्तीला तिघांनी शिवीगाळ व मारहाण करून काठीने डोक्यात दुखापत केल्याची घटना तळेगाव दाभाडे येथील वीर चक्र चौक परिसरात घडली. याप्रकरणी तळेगाव दाभाडे पोलिस ठाण्यात तिघांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी अभिजीत अशोक धर्माधिकारी (वय ४८, रा. अंकलन नगर, तळेगाव दाभाडे, ता. मावळ, जि. पुणे) हे दि. ६ ऑगस्ट रोजी सायंकाळी सुमारे ६ वाजता वीर चक्र चौक येथील देशी बारमध्ये होते. त्यावेळी आरोपी मंगेश सांडभोर, किरण, संतोष (पूर्ण नाव व पत्ता अज्ञात) यांनी त्यांच्याकडे दारू पिण्यासाठी उसने पैसे मागितले.
धर्माधिकारी यांनी पैसे देण्यास नकार दिल्याने आरोपींनी त्यांच्याशी वाद घालत शिवीगाळ व मारहाण केली. यावेळी आरोपी क्रमांक एकने हातातील काठीने धर्माधिकारी यांच्या डोक्यात मारून त्यांना जखमी केले.
या प्रकरणी तळेगाव दाभाडे पोलिस ठाण्यात गुन्हा रजिस्टर क्रमांक २८५/२०२६, भारतीय न्याय संहिता कलम ११८(१), ३(५) तसेच भादंवि कलम ३२४ अन्वये गुन्हा दाखल करण्यात आला आहे. पुढील तपास पोलिस करीत आहेत.
