द.चाकण,(मेदनकरवाडी) प्रतिनिधी : पैसे परत मागितल्याच्या कारणावरून झालेल्या वादातून एका तरुणाला केबलने मारहाण करून जखमी केल्याची, तसेच त्याच्या पत्नीला चपलेने मारहाण केल्याची घटना मेदनकरवाडी येथील बंगलावस्ती परिसरात घडली. याप्रकरणी दक्षिण चाकण पोलिस ठाण्यात तीन जणांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, कानिफनाथ जालीदर शिंदे (वय २६, रा. बंगलावस्ती, मेदनकरवाडी, ता. खेड, जि. पुणे; मूळ रा. गोगरगाव, ता. श्रीगोंदा, जि. अहिल्यानगर) यांनी फिर्याद दिली आहे. त्यानुसार प्रज्ञा प्रविण तापकिर (वय २२), प्रविण शहाजी तापकिर (वय ३५) आणि सारिका बाळासाहेब उगले (वय ४५, सर्व रा. खांडवी, ता. कर्जत, जि. अहिल्यानगर) यांच्याविरुद्ध गुन्हा दाखल करण्यात आला आहे.
फिर्यादी हे त्यांच्या पत्नी कोमल शिंदे यांच्यासह बंगलावस्ती, मेदनकरवाडी येथील राहत्या घरी असताना आरोपी संगनमताने तेथे आले. आरोपी क्रमांक १ हिला दिलेले पैसे परत मागितल्याच्या कारणावरून आरोपी चिडले. त्यानंतर आरोपी क्रमांक ३ हिने फिर्यादी यांच्या पत्नीची गचांडी धरून चपलेने मारहाण केल्याचे फिर्यादीत नमूद आहे.
तसेच आरोपी क्रमांक १ हिने तिच्याकडील केबलने फिर्यादी यांच्या दोन्ही हातांवर, पायावर, मांडीवर, कंबरेवर आणि पाठीवर मारहाण करून जखमी केल्याचे पोलिसांनी सांगितले.
या प्रकरणी दक्षिण चाकण पोलिस ठाण्यात गुन्हा रजि. क्र. ००७/२०२६ अन्वये भारतीय न्याय संहिता कलम ११८(१), ३५१(२), ३५२, ३(५), ३२९(४) तसेच भादंवि कलम ३२४, ५०६, ५०४, ३४ प्रमाणे गुन्हा दाखल करण्यात आला आहे. घटना ७ ऑगस्ट २०२६ रोजी पहाटे ४.१५ वाजता घडली असून, गुन्हा ८ ऑगस्ट रोजी रात्री १०.४७ वाजता दाखल करण्यात आला.या प्रकरणाचा पुढील तपास पोलीस उपनिरीक्षक सुकाळे करीत आहेत. त्यांना पोलीस हवालदार बांगर सहकार्य करीत आहेत.
