पुणे, शिरगाव प्रतिनिधी : शिरगाव ते गहुंजे मार्गावर सैनिक स्कूलजवळ कार चालकाने निष्काळजीपणे वाहन चालवत दुचाकीला धडक दिल्याने १७ वर्षीय युवक गंभीर जखमी झाला. या अपघातात युवकाच्या डोक्याला व मांडीच्या हाडाला फ्रॅक्चर झाले असून, दोन्ही वाहनांचे नुकसान झाले आहे.
पोलिसांनी दिलेल्या माहितीनुसार, हा अपघात ८ ऑगस्ट २०२६ रोजी सकाळच्या सुमारास गहुंजे गावच्या हद्दीत सैनिक स्कूलजवळ, शिरगाव-गहुंजे रस्त्यावर घडला. याप्रकरणी सुनील गणेश शर्मा (वय ४०, रा. शिरगाव, मावळ) यांनी शिरगाव पोलिस ठाण्यात फिर्याद दिली आहे.
फिर्यादींचा मुलगा अभिषेक सुनील शर्मा (वय १७) हा हिरो स्प्लेंडर प्लस एक्सटेक दुचाकीवरून गहुंजे बाजूकडून शिरगावच्या दिशेने येत होता. त्याचवेळी आरोपी तळशीराम गोविंदराव मलूकपाडे (वय २९, रा. वाघोली, पुणे; मूळ रा. नांदेड) हा स्विफ्ट डिझायर कार (एमएच १२ व्ही.व्ही. १३८) घेऊन शिरगावकडून गहुंजेकडे जात होता.
आरोपीने रस्त्याच्या परिस्थितीकडे दुर्लक्ष करून वाहन हयगयीने व अविचाराने चालवत रॉंग साइडला जाऊन अभिषेकच्या दुचाकीला धडक दिल्याचे फिर्यादीत नमूद करण्यात आले आहे. या धडकेत अभिषेकच्या डोक्याला व मांडीच्या हाडाला फ्रॅक्चर होऊन गंभीर दुखापत झाली. तसेच दोन्ही वाहनांचे नुकसान झाले.
या प्रकरणी शिरगाव पोलिस ठाण्यात भारतीय न्याय संहितेतील संबंधित कलमांसह मोटार वाहन कायदा कलम १८४ तसेच भादंवि कलम २७९, ३३७, ३३८ अन्वये गुन्हा दाखल करण्यात आला आहे. पुढील तपास पोलिस करीत आहेत.
