प्रदेश संघटकपदी अरुण (नाना)कांबळे; पिंपरी-चिंचवड शहराध्यक्षपदी रोहित खर्गे, कार्याध्यक्षपदी दादाराव आढाव
पत्रकारिता ही लोकशाहीचा महत्त्वाचा आधारस्तंभ – उपमहापौर शर्मिला बाबर
पिंपरी, दि. ७ ऑगस्ट : मराठी पत्रकार संघ, पिंपरी-चिंचवड शहर व पुणे जिल्हा कार्यकारिणी तसेच नवनिर्वाचित पदाधिकाऱ्यांचा पदग्रहण व नियुक्तीपत्र प्रदान समारंभ पिंपरी-चिंचवड महानगरपालिका पत्रकार कक्षात उत्साहात पार पडला. यावेळी नवनिर्वाचित पदाधिकाऱ्यांचा उपमहापौर शर्मिला बाबर, सत्तारूढ पक्षनेते प्रशांत शितोळे, मराठी पत्रकार संघाचे प्रदेशाध्यक्ष किरण जोशी, प्रदेश उपाध्यक्ष विवेक इनामदार, प्रदेश संघटक अरुण कांबळे आणि पुणे जिल्हाध्यक्ष संजय मराठे यांच्या हस्ते सत्कार करण्यात आला.
यावेळी उपमहापौर शर्मिला बाबर आणि सत्तारूढ पक्षनेते प्रशांत शितोळे यांनी नवनिर्वाचित पदाधिकाऱ्यांचे अभिनंदन करून त्यांच्या पुढील कार्यासाठी शुभेच्छा दिल्या. नगरसेवक उत्तम केंदळे यांचीही यावेळी उपस्थिती होती.
मराठी पत्रकार संघाची नूतन कार्यकारिणी जाहीर करून प्रदेशाध्यक्ष किरण जोशी यांच्या हस्ते नवनिर्वाचित पदाधिकाऱ्यांना नियुक्तीपत्रे प्रदान करण्यात आली. प्रदेश संघटकपदी अरुण कांबळे, पिंपरी-चिंचवड शहराध्यक्षपदी रोहित खर्गे, महिला पुणे जिल्हाध्यक्षपदी मनीषा थोरात पिसाळ, पिंपरी-चिंचवड शहर महिला अध्यक्षपदी अर्चना मेंगडे, कार्याध्यक्षपदी दादाराव आढाव, उपाध्यक्षपदी गणेश मोरे, सचिवपदी बजरंग मासाळ, खजिनदारपदी संतोष जाधव, संपर्कप्रमुखपदी संदीप सोनार यांची नियुक्ती करण्यात आली.
तसेच नागेश खजूर्गीकर, बलभीम भोसले, उमेश सनस, सीताराम मोरे, उमेश यादव, संतलाल यादव, श्रीधर जगताप आणि अजय कुलकर्णी यांचीही कार्यकारिणीत नियुक्ती करण्यात आली.
यावेळी बोलताना उपमहापौर शर्मिला बाबर म्हणाल्या, “शहरातील नागरिकांच्या भावना, समस्या आणि अपेक्षा प्रशासनापर्यंत पोहोचविण्याचे महत्त्वाचे काम पत्रकार बांधव करीत असतात. नागरिक आणि प्रशासन यांच्यातील दुवा म्हणून पत्रकारांची भूमिका अत्यंत महत्त्वाची आहे.”
शहराच्या विकासाच्या प्रक्रियेत पत्रकारांनी सकारात्मक, निष्पक्ष आणि वस्तुनिष्ठ पत्रकारितेच्या माध्यमातून नागरिकांचे प्रश्न मांडावेत. आपल्या लेखणीच्या माध्यमातून समाजातील विविध घटकांना न्याय देण्याबरोबरच शहरातील विकासकामांची माहिती नागरिकांपर्यंत पोहोचवावी. जनहिताचे प्रश्न सातत्याने मांडून प्रशासन आणि नागरिकांमधील संवाद अधिक प्रभावी करण्याचे काम पत्रकारांनी करावे, असे आवाहनही बाबर यांनी केले.
कार्यक्रमाचे प्रास्ताविक अरुण कांबळे यांनी केले. सूत्रसंचालन विवेक इनामदार यांनी केले, तर आभार रोहित खर्गे यांनी मानले.कार्यक्रमास मराठी पत्रकार संघाचे पदाधिकारी, सदस्य, विविध माध्यमांचे पत्रकार तसेच विविध क्षेत्रातील मान्यवर मोठ्या संख्येने उपस्थित होते.
