शहराध्यक्ष शत्रुघ्न (बापू) काटे यांच्या हस्ते नियुक्तीपत्र प्रदान; पक्षाची भूमिका आक्रमकपणे मांडण्याचा संकल्प
पिंपरी-चिंचवड : भारतीय जनता पार्टीच्या पिंपरी-चिंचवड शहर संघटन बळकटीकरणाला अधिक गती देण्यासाठी तसेच पक्षाची भूमिका आणि विकासकामे जनतेसमोर प्रभावीपणे मांडण्यासाठी मा. नगरसेवक राज अनंत दुर्गे यांची भाजप पिंपरी-चिंचवड शहराच्या मुख्य प्रवक्तेपदी नियुक्ती करण्यात आली आहे.
भाजप पिंपरी-चिंचवड शहराध्यक्ष तथा नगरसेवक शत्रुघ्न (बापू) काटे यांच्या प्रमुख उपस्थितीत राज दुर्गे यांना नियुक्तीपत्र प्रदान करण्यात आले. या महत्त्वपूर्ण जबाबदारीची सूत्रे स्वीकारताना पक्षाची ध्येय-धोरणे, केंद्र व राज्य सरकारची विकासकामे तसेच शहरातील महापालिकेच्या माध्यमातून सुरू असलेल्या विविध विकासप्रकल्पांची प्रभावी मांडणी करण्याचा संकल्प त्यांनी व्यक्त केला.
पक्षाचा विचार आणि शहराचा विकास जनतेपर्यंत पोहोचवा : शत्रुघ्न (बापू) काटे
राज दुर्गे यांचे अभिनंदन करताना शहराध्यक्ष शत्रुघ्न (बापू) काटे म्हणाले, “राज दुर्गे हे अभ्यासू, प्रभावी वक्ते असून पक्षाची विचारधारा तळागाळातील कार्यकर्त्यांपर्यंत आणि जनतेपर्यंत पोहोचविणारे धडाडीचे कार्यकर्ते आहेत. केंद्र व राज्य सरकारच्या धोरणात्मक निर्णयांची प्रभावी मांडणी करणे, महापालिकेच्या माध्यमातून शहरात झालेल्या विविध विकासकामांचा आलेख जनतेसमोर मांडणे तसेच विरोधकांकडून होणाऱ्या खोट्या प्रचाराला वस्तुनिष्ठ आणि चोख प्रत्युत्तर देणे, या सर्व बाबींमध्ये त्यांची भूमिका महत्त्वपूर्ण ठरेल. त्यांच्या नियुक्तीमुळे पक्षाच्या माध्यम आणि जनसंपर्क व्यवस्थेला निश्चितच बळकटी मिळेल,” असा विश्वास त्यांनी व्यक्त केला.
पक्षाची ध्येय-धोरणे ठामपणे मांडणार : राज दुर्गे
नियुक्तीबद्दल प्रतिक्रिया व्यक्त करताना राज दुर्गे म्हणाले, “माझ्यासारख्या निष्ठावंत कार्यकर्त्यावर शहराध्यक्ष शत्रुघ्न (बापू) काटे आणि पक्ष नेतृत्वाने दाखवलेला विश्वास माझ्यासाठी अत्यंत मोलाचा आहे. भारतीय जनता पार्टीची ध्येय-धोरणे, विचारसरणी आणि पिंपरी-चिंचवड शहरात झालेला विकास विविध प्रसारमाध्यमे तसेच सोशल मीडियाच्या माध्यमातून प्रभावीपणे जनतेपर्यंत पोहोचविण्यासाठी मी पूर्ण ताकदीने कार्यरत राहीन. पक्षाची भूमिका ठामपणे आणि आक्रमकपणे मांडत असताना वस्तुनिष्ठ माहितीच्या आधारे जनतेसमोर सत्य मांडण्याला माझे प्राधान्य राहील,” असे त्यांनी सांगितले.
