पिंपरी-चिंचवड (प्रतिनिधी) : पिंपरी-चिंचवड पोलीस आयुक्तालयाने अवैध दारू व्यवसाय आणि सराईत गुन्हेगारीविरोधात कठोर पाऊल उचलत तीन अट्टल गुन्हेगारांना महाराष्ट्र धोकादायक व्यक्ती प्रतिबंधक कायदा (एमपीडीए) अंतर्गत एक वर्षासाठी स्थानबद्ध केले आहे. पोलीस आयुक्त विनय कुमार चौबे यांनी संबंधित प्रस्तावांची पडताळणी करून ही कारवाई केली.
स्थानबद्ध करण्यात आलेल्या गुन्हेगारांमध्ये कोंडीबा आडेप्पा कांबळे (वय ३७, पिंपळे गुरव), जीवन मारुती राजपूत (वय ४८, गोनवडी, ता. खेड) आणि धनराज सोमाजी नट (वय ३५, हिंजवडी) यांचा समावेश आहे.
सांगवी पोलीस ठाण्याच्या हद्दीतील कोंडीबा कांबळे याच्यावर अवैध दारू विक्रीचे नऊ गुन्हे दाखल असून, उत्तर महाळुंगे एमआयडीसी पोलीस ठाण्याच्या हद्दीतील जीवन राजपूत याच्यावर गावठी हातभट्टी दारू तयार करून विक्री केल्याचे १४ गुन्हे नोंद आहेत. तर हिंजवडी पोलीस ठाण्याच्या हद्दीतील धनराज नट याच्यावर अवैध गावठी दारू विक्रीचे चार गुन्हे दाखल आहेत.
आयुक्तांच्या आदेशानुसार कोंडीबा कांबळे आणि जीवन राजपूत यांना हरसूल मध्यवर्ती कारागृह, छत्रपती संभाजीनगर, तर धनराज नट याला येरवडा मध्यवर्ती कारागृह, पुणे येथे एका वर्षासाठी स्थानबद्ध करण्यात आले आहे.
पोलीस आयुक्त विनय कुमार चौबे यांनी अवैध दारू व्यवसाय आणि समाजात दहशत निर्माण करणाऱ्या गुन्हेगारांविरोधात ‘शून्य सहनशीलता’ धोरण अवलंबिले असून, अशा गुन्हेगारांवर कठोर प्रतिबंधक कारवाई सुरूच राहणार असल्याचे स्पष्ट केले आहे. समाजाच्या सुरक्षिततेशी खेळणाऱ्या अवैध दारू माफियांचे संपूर्ण जाळे उद्ध्वस्त करण्यासाठी पोलीस प्रशासन कटिबद्ध असल्याचा इशाराही त्यांनी दिला.
यावर्षी जानेवारी ते जुलै २०२६ या कालावधीत एमपीडीए कायद्यांतर्गत ११ जणांवर स्थानबद्धतेची कारवाई करण्यात आली असून, २०२५ मध्ये अशा ३५ कारवाया करण्यात आल्या होत्या. या कारवायांमुळे परिसरातील गुन्हेगारीवर प्रभावी नियंत्रण मिळविण्यास मदत होत असल्याचे पोलिसांनी सांगितले.
ही कारवाई पोलीस आयुक्त विनय कुमार चौबे, सहआयुक्त डॉ. शशिकांत महावरकर, अपर पोलीस आयुक्त (गुन्हे) सारंग आवाड यांच्यासह वरिष्ठ अधिकाऱ्यांच्या मार्गदर्शनाखाली सांगवी, हिंजवडी, उत्तर महाळुंगे एमआयडीसी पोलीस ठाणे आणि गुन्हे शाखेच्या पथकाने संयुक्तपणे यशस्वीरीत्या पार पाडली.
