जबरी चोरी, सायबर फसवणूक, घरफोडी आणि अवैध शस्त्रप्रकरणे
पिंपरी, दि. ४ ऑगस्ट : पिंपरी-चिंचवड पोलीस आयुक्तालयाच्या हद्दीत ३ ऑगस्ट २०२६ रोजी मध्यरात्री १२ ते रात्री १२ या २४ तासांत विविध पोलीस ठाण्यांमध्ये एकूण ९ गंभीर गुन्ह्यांची नोंद झाली आहे. यामध्ये जबरी चोरी, सायबर फसवणूक, घरफोडी, मारहाण, वाहन चोरी तसेच अवैध शस्त्र बाळगल्याप्रकरणी गुन्ह्यांचा समावेश आहे.
सांगवी पोलीस ठाण्यात पवनानगर-रहाटणी परिसरात कोयत्याचा धाक दाखवून दुचाकीस्वाराकडून तीन हजार रुपये लुटून वाहनाचे नुकसान केल्याप्रकरणी गुन्हा दाखल करण्यात आला असून एका आरोपीला अटक करण्यात आली आहे.
हिंजवडी पोलीस ठाण्यात सायबर फसवणुकीच्या मोठ्या रॅकेटचा पर्दाफाश झाला आहे. बनावट बँक खात्यांच्या माध्यमातून देशभरातील नागरिकांची फसवणूक केल्याप्रकरणी ५०.९४ लाख रुपयांच्या व्यवहारांशी संबंधित गुन्हा दाखल करण्यात आला असून आरोपीच्या खात्यात २८ हजार २८० रुपयांचे व्यवहार झाल्याचे तपासात निष्पन्न झाले आहे.
पिंपरी पोलीस ठाण्यात राजस्थानमधील एनसीसीआरपी तक्रारीशी संबंधित सायबर फसवणुकीच्या प्रकरणात एक लाख रुपयांची रक्कम आरोपीच्या खात्यावर जमा करून एटीएममधून काढल्याचा गुन्हा दाखल करण्यात आला आहे.
शिरगाव पोलीस ठाण्याच्या हद्दीत गहुंजे येथील एका घरातून तब्बल २१ लाख २५ हजार ६०० रुपयांचे सोन्याचे दागिने चोरी करून त्यांच्या जागी बनावट दागिने ठेवून फसवणूक केल्याचा धक्कादायक प्रकार समोर आला आहे.
वाकड पोलीस ठाण्याच्या हद्दीत किरकोळ कारणावरून कारचालक, त्याचे कुटुंबीय आणि हॉटेल कर्मचाऱ्याला लाकडी दांडके व सिमेंट ब्लॉकने मारहाण करून हॉटेलवर दगडफेक करण्यात आली.
चिखली पोलीस ठाण्यात दोन स्वतंत्र गुन्ह्यांची नोंद झाली. पहिल्या प्रकरणात पार्किंगमध्ये झालेल्या वादातून छत्रीच्या दांड्याने मारहाण केल्याप्रकरणी गुन्हा दाखल झाला. तर दुसऱ्या कारवाईत एका तरुणासह एका विधीसंघर्षित बालकाकडून देशी बनावटीचे पिस्तूल, मॅगझीन आणि दोन जिवंत काडतुसे जप्त करून दोघांविरुद्ध भारतीय हत्यार कायदा आणि महाराष्ट्र पोलीस अधिनियमांतर्गत गुन्हा दाखल करण्यात आला.
आळंदी पोलीस ठाण्याच्या हद्दीत पार्किंगमधून दहा हजार रुपये किमतीची होंडा अॅक्टिव्हा दुचाकी चोरीस गेल्याची तक्रार दाखल झाली असून अज्ञात चोरट्याचा शोध सुरू आहे.
काळेवाडी पोलीस ठाण्याच्या हद्दीत मनाई आदेश असताना धारदार कोयता बाळगल्याप्रकरणी एका १९ वर्षीय तरुणाविरुद्ध आर्म अॅक्ट व महाराष्ट्र पोलीस अधिनियमांतर्गत गुन्हा दाखल करण्यात आला आहे.
या सर्व प्रकरणांचा पुढील तपास संबंधित पोलीस ठाण्यांचे अधिकारी करीत आहेत.
