चिंचवड, दि. ४ ऑगस्ट – रोटरी क्लब ऑफ वाल्हेकरवाडीच्या वतीने ग्रामीण भागातील विद्यार्थिनींच्या आरोग्य संवर्धनासाठी राबविण्यात येत असलेल्या ‘निर्मला’ प्रकल्पांतर्गत सातारा जिल्ह्यातील एका शाळेला सॅनिटरी पॅड मशीन प्रदान करण्यात आले.
चिंचवडगाव पोलीस स्टेशनच्या ग्राम सुरक्षा दल व शांतता समितीच्या सदस्यांचा सातारा दौरा सोमवार, दि. ३ मे रोजी आयोजित करण्यात आला होता. या दौऱ्यादरम्यान वाई तालुक्यातील बोपेगाव येथील किसनवीर शैक्षणिक, क्रीडा व सांस्कृतिक प्रतिष्ठान संचलित रामराव पाटील माध्यमिक विद्यालयाला भेट देण्यात आली.
रोटरी क्लब ऑफ वाल्हेकरवाडीचे संस्थापक सदस्य संतोष वाल्हेकर यांच्या प्रयत्नांतून मिस्तुबा इंडिया प्रायव्हेट लिमिटेड या कंपनीकडून सीएसआर निधी प्राप्त झाला होता. या निधीतून ग्रामीण, डोंगराळ व आर्थिकदृष्ट्या दुर्बल कुटुंबांतील इयत्ता आठवी ते दहावीच्या विद्यार्थिनींसाठी ४० शाळांना सॅनिटरी पॅड मशीनचे वितरण करण्यात आले आहे.
वाई येथील शिक्षक शेखर जाधव यांनी बोपेगाव शाळेसाठी मशीनची विनंती केली होती. त्यानुसार रोटरी क्लबचे संस्थापक अध्यक्ष रोटरियन प्रदीप वाल्हेकर व त्यांच्या टीमने तात्काळ मंजुरी दिली. मशीन शाळेत पोहोचविण्याची जबाबदारी सामाजिक कार्यकर्त्यांनी स्वीकारली.
शाळेत पोहोचल्यानंतर मुख्याध्यापक गणेश पांडुरंग धाडवे, शिक्षक व विद्यार्थ्यांनी ग्राम सुरक्षा दलाच्या सदस्यांचे स्वागत केले. उपस्थितांना मशीनची माहिती देण्यात आली तसेच प्रत्यक्ष प्रात्यक्षिकही दाखविण्यात आले.
दौऱ्यादरम्यान सदस्यांनी ‘जानाई हॉटेल’ येथे नाश्ता केला. या हॉटेलमध्ये प्लास्टिकऐवजी संपूर्ण स्टीलच्या भांड्यांचा वापर होत असल्याने पर्यावरणपूरक उपक्रमाचे विशेष कौतुक करण्यात आले. यावेळी रोटरियन गणेश बोरा यांच्या ‘स्टील प्लेट बँक’ उपक्रमाचीही आठवण उपस्थितांनी व्यक्त केली.
