महापौर मंजुषाताई नागपुरे यांच्या हस्ते उद्घाटन; सुरक्षित, किफायतशीर पावसाळी पर्यटनासाठी नागरिकांना आवाहन
पुणे, दि. ४ ऑगस्ट : पावसाळ्यातील निसर्गरम्य पर्यटनाला चालना देण्यासाठी पुणे महानगर परिवहन महामंडळच्या वतीने मार्ग क्र. ९ (अ) ‘वर्षा सहल’ विशेष पर्यटन बस सेवेचा शुभारंभ मंगळवारी स्वारगेट बसस्थानक येथे उत्साहपूर्ण वातावरणात करण्यात आला. या विशेष बस सेवेचे उद्घाटन पुणे महानगरपालिकेच्या महापौर मंजुषाताई नागपुरे यांच्या हस्ते झाले. यावेळी पीएमपीएमएलचे संचालक अजय खेडेकर उपस्थित होते.
‘वर्षा सहल’ या विशेष पर्यटन बस सेवेच्या माध्यमातून पर्यटकांना पावसाळ्यातील निसर्गसौंदर्याचा आनंद घेता यावा, यासाठी मुळशी धरण, पळसे धबधबा तसेच नयनरम्य सेल्फी पॉईंट अशा आकर्षक पर्यटनस्थळांची सुरक्षित, आरामदायी आणि आनंददायी सफर उपलब्ध करून देण्यात आली आहे.
उद्घाटनप्रसंगी महापौर मंजुषाताई नागपुरे म्हणाल्या, “पीएमपीएमएलचा हा उपक्रम पुणेकरांसह पर्यटकांसाठी अत्यंत उपयुक्त असून पावसाळी पर्यटनाला निश्चितच चालना मिळेल. सुरक्षित, किफायतशीर आणि नियोजनबद्ध पर्यटनाची संधी उपलब्ध करून देणारा हा स्तुत्य उपक्रम आहे.” तसेच पुणे महानगरपालिकेच्या सर्व महिला नगरसेविकांसाठीही या विशेष पर्यटन बस सेवेअंतर्गत स्वतंत्र सहलीचे आयोजन करण्याची सूचनाही त्यांनी केली.
यावेळी पीएमपीएमएलचे संचालक अजय खेडेकर यांनी पर्यटन बस सेवेचे महत्त्व अधोरेखित करत नागरिकांनी मोठ्या संख्येने या सेवेचा लाभ घ्यावा, असे आवाहन केले.
कार्यक्रमास वाहतूक व्यवस्थापक यशवंत हिंगे, जनसंपर्क अधिकारी नागेश गायकवाड तसेच पीएमपीएमएलचे अधिकारी व कर्मचारी मोठ्या संख्येने उपस्थित होते.पावसाळ्यातील निसर्गरम्य स्थळांचा सुरक्षित व संस्मरणीय अनुभव घेण्यासाठी पुणेकरांनी पीएमपीएमएलच्या ‘वर्षा सहल’ विशेष पर्यटन बस सेवेचा लाभ घ्यावा, असे आवाहन महामंडळाच्या वतीने करण्यात आले.
