१५० कोटींच्या सायबर फसवणूक प्रकरणात मोशीतील तरुण अटकेत

६५ नागरिकांची फसवणूक, ९ बँक खात्यांतून १.१५ कोटींचे व्यवहार

पिंपरी, दि. ४ ऑगस्ट : देशातील विविध राज्यांतील ६५ नागरिकांची तब्बल १५० कोटी रुपयांची इन्व्हेस्टमेंट व इतर ऑनलाइन फसवणूक करणाऱ्या टोळीतील एका संशयिताला आळंदी पोलिसांनी अटक केली आहे. अटक करण्यात आलेल्या आरोपीचे नाव सचिन संजय काळे (वय २५, रा. गोडाऊन चौकाजवळ, मोशी, ता. हवेली, जि. पुणे) असे आहे.

पिंपरी-चिंचवड पोलीस आयुक्तालयाचे पोलीस आयुक्त विनयकुमार चौबे यांच्या मार्गदर्शनाखाली आळंदी पोलीस ठाण्यातील सायबर सेल म्युल (Mule) बँक खात्यांचा तपास करत असताना आरोपी स्वतःच्या बँक खात्यांचा वापर ऑनलाइन फसवणुकीतून मिळालेली रक्कम स्वीकारण्यासाठी करत असल्याची माहिती मिळाली.

या प्रकरणी आळंदी पोलीस ठाण्यात गुन्हा क्रमांक २७४/२०२६ आणि २८३/२०२६ असे दोन गुन्हे भारतीय न्याय संहिता (BNS) कलम ११२(२), ६१(१), ३१८(४) व ३(५) अंतर्गत दाखल करण्यात आले आहेत.

तपासादरम्यान आरोपीने स्वतःच्या नावावर विविध बँकांमध्ये एकूण नऊ बँक खाती उघडल्याचे निष्पन्न झाले. या खात्यांमध्ये सायबर फसवणुकीतील रक्कम जमा करून ती एटीएम व धनादेशाच्या माध्यमातून काढण्यात आल्याचे समोर आले.

एनसीसीआरपी (NCRP) पोर्टलवरील माहितीनुसार, देशातील विविध राज्यांतील ६५ नागरिकांची सुमारे १५० कोटी रुपयांची फसवणूक झाल्याचे आढळले. यापैकी आरोपीच्या नऊ खात्यांमध्ये १ कोटी १५ लाख रुपयांचे व्यवहार झाल्याचे तपासात निष्पन्न झाले असून त्यानंतर सचिन काळे याला अटक करण्यात आली आहे. या प्रकरणातील इतर साथीदारांचा शोध सुरू असल्याचे पोलिसांनी सांगितले.

ही कारवाई पोलीस आयुक्त विनयकुमार चौबे, सहपोलीस आयुक्त शशीकांत महावरकर, अप्पर पोलीस आयुक्त (गुन्हे) सारंग आव्हाड, अप्पर पोलीस आयुक्त (प्रादेशिक) बसवराज तेली, पोलीस उपायुक्त मारुती जगताप आणि सहाय्यक पोलीस आयुक्त योगेश रांजनकर यांच्या मार्गदर्शनाखाली वरिष्ठ पोलीस निरीक्षक बी. एस. नरके, पोलीस उपनिरीक्षक तुकाराम खडके, महिला पोलीस हवालदार आरती निकम तसेच पोलीस शिपाई सोळंके व जगताप यांच्या पथकाने केली.

पोलिसांनी नागरिक, विद्यार्थी आणि व्यावसायिकांना आवाहन केले आहे की, आपले बँक खाते किंवा सिमकार्ड कोणत्याही अनोळखी व्यक्तीला वापरण्यास देऊ नये. तसेच अनोळखी व्यक्तीकडून ऑनलाइन स्वरूपात पैसे स्वीकारून ते एटीएम किंवा धनादेशाद्वारे काढून देण्याचे प्रकार टाळावेत. अशा रकमा सायबर फसवणुकीतील असण्याची शक्यता असते, असेही पोलिसांनी स्पष्ट केले.