चिखली, दि.३ ऑगस्ट : चिंचवड येथील पूर्णानगर परिसरात किरकोळ कारणावरून झालेल्या वादाचे हिंसक रूप धारण झाल्याने दोन जणांवर धारदार शस्त्राने जीवघेणा हल्ला करण्यात आल्याची घटना घडली. या प्रकरणी चिखली पोलिसांनी तिघांविरुद्ध भारतीय न्याय संहिता २०२३ अंतर्गत खुनाच्या प्रयत्नासह विविध कलमांन्वये गुन्हा दाखल केला असून एका आरोपीला अटक करण्यात आली आहे.
पोलिसांनी दिलेल्या माहितीनुसार, ही घटना १ ऑगस्ट रोजी सायंकाळी साडेसहा वाजण्याच्या सुमारास भोसले पेट्रोल पंपाजवळील रोशन बिअर शॉपीसमोरील सर्व्हिस रोड, पूर्णानगर, चिंचवड येथे घडली. याप्रकरणी आकाश विलास कसबे (वय २६, रा. सोमाटणे) यांनी फिर्याद दिली आहे.
या प्रकरणी सुप्रीम राजू काळे (वय २५, रा. शंकरनगर, चिंचवड), साहिल भिसे (वय २३, रा. रामनगर, चिंचवड) आणि अभिषेक प्रकाश घनघाव (वय २६, रा. चिंचवड) यांच्याविरुद्ध गुन्हा दाखल करण्यात आला आहे. यापैकी अभिषेक घनघाव याला पोलिसांनी अटक केली आहे.
फिर्यादीनुसार, फिर्यादी व त्यांचे मित्र शुभम फरतडे आणि संजु मामा हे घटनास्थळी उभे असताना आरोपी सुप्रीम काळे हा रस्त्यालगत लघुशंका करत होता. त्यावेळी त्याचे शिंतोडे शुभम फरतडे यांच्या मोटारसायकलवर उडाल्याने “इथे लघुशंका करू नको,” अशी सूचना करण्यात आली. त्याचा राग आल्याने आरोपीने शुभम फरतडे यांना मारहाण व शिवीगाळ केली. त्यानंतर झालेल्या वादात आरोपीने खिशातील धारदार शस्त्र काढून शुभम फरतडे व फिर्यादी आकाश कसबे यांच्या पोटावर वार करून त्यांना गंभीर जखमी केले.
तसेच दुसऱ्या आरोपीने घटनास्थळी असलेला दगड उचलून फिर्यादींकडे फेकल्याचेही तक्रारीत नमूद आहे. दरम्यान, उपस्थित नागरिक व मित्रांनी भांडण सोडविण्याचा प्रयत्न केला असता आरोपींनी हातातील धारदार शस्त्र हवेत फिरवत “समोर या, तुम्हाला कापून टाकतो,” अशी धमकी देत परिसरात दहशत निर्माण केल्याचा आरोप फिर्यादीने केला आहे.या प्रकरणाचा पुढील तपास पोलीस उपनिरीक्षक देवकुळे यांच्या मार्गदर्शनाखाली सुरू आहे.
