तळेगाव दाभाडे प्रतिनिधी : सायबर फसवणुकीतून आलेली रक्कम स्वतःच्या बँक खात्यावर स्वीकारून फसवणुकीत सहभागी झाल्याप्रकरणी तळेगाव दाभाडे पोलिसांनी एका तरुणाविरुद्ध गुन्हा दाखल केला आहे. आशुतोष विलास शेजूळ (वय ३०, रा. ७२, शनिवार पेठ, तळेगाव दाभाडे, ता. मावळ, जि. पुणे) असे गुन्हा दाखल झालेल्या आरोपीचे नाव आहे.
पोलिसांनी दिलेल्या माहितीनुसार, १ जानेवारी २०२६ ते १७ जुलै २०२६ या कालावधीत तळेगाव दाभाडे येथील बँक ऑफ महाराष्ट्रमध्ये आरोपीने आशुतोष विलास शेजूळ या नावाने खाते क्रमांक ६०५५०५५५२८७ उघडले. त्यानंतर साथीदारांशी संगनमत करून सायबर फसवणुकीतील रक्कम स्वीकारण्यासाठी या खात्याचा वापर केल्याचे तपासात निष्पन्न झाले.
आरोपीने सदर खात्यावर एकूण १ लाख ३० हजार २ रुपये इतके आर्थिक व्यवहार केले असून, भारतातील दोन नागरिकांच्या सायबर फसवणुकीशी संबंधित तक्रारींमधील एकूण २ लाख १ हजार ५०० रुपये रक्कम त्याच्याकडून स्वीकारण्यात आल्याचे पोलिस तपासात समोर आले आहे.
या प्रकरणी ३० जुलै २०२६ रोजी सायंकाळी ४.३१ वाजता तळेगाव दाभाडे पोलीस ठाण्यात गुन्हा दाखल करण्यात आला. पोलिस शिपाई इंद्रभान सुभाष इंगळे (बक्कल क्र. ३४२५) यांनी फिर्याद दिली आहे.
याप्रकरणी भारतीय न्याय संहिता कलम ११२(२), ६१(२), ३१८(४) व ३(५) अन्वये गुन्हा दाखल करण्यात आला असून, पुढील तपास सपोनि गावडे करीत आहेत.
