पिंपरी,संत तुकाराम नगर| प्रतिनिधी….ऋकपड्यांचा व्यवसाय सुरू करण्याचे आमिष दाखवून विश्वासाने सोपविण्यात आलेले तब्बल २७६० रेडिमेड कपड्यांचे पीस परस्पर लंपास केल्याप्रकरणी संततुकारामनगर पोलिसांनी एका व्यक्तीविरुद्ध गुन्हा दाखल केला असून, आरोपीला अटक करण्यात आली आहे.
याप्रकरणी रक्षित पी. प्रभू छाबडा (वय ३६, व्यवसाय गारमेंट्स, रा. जी-१७, दुबे कॉलनी, माणिकबाग रोड, इंदोर) यांनी फिर्याद दिली आहे. आरोपी रवि संबुलाल बठलिया (वय ३९, व्यवसाय कपडा व्यवसाय, मूळ रा. विक्रमगड, आलोट, जि. रतलाम, मध्यप्रदेश) याच्याविरुद्ध संततुकारामनगर पोलीस ठाण्यात गुन्हा दाखल करण्यात आला आहे.
फिर्यादीनुसार, मे २०२६ पासून २९ जुलै २०२६ पर्यंत आरोपी हा पिंपरी परिसरातील इंगळे यांच्या गोदामात काम करीत होता. महाराष्ट्रात आपल्या अनेक ओळखी असल्याचे सांगून तसेच कपड्यांचे दुकान सुरू करण्यास सांगून आरोपीने फिर्यादीचा विश्वास संपादन केला. त्यानंतर विक्रीसाठी विश्वासाने सोपविण्यात आलेले रेडिमेड कपड्यांचे एकूण २७६० पीस आरोपीने परस्पर लंपास केल्याचे फिर्यादीत नमूद आहे.
या प्रकरणी संततुकारामनगर पोलीस ठाण्यात गुन्हा रजिस्टर क्रमांक ३२४/२०२६ अन्वये भारतीय न्याय संहिता कलम ३१८(४), ३१६(४) प्रमाणे गुन्हा दाखल करण्यात आला आहे. आरोपीला अटक करण्यात आली असून, पुढील तपास पोलीस करीत आहेत.
