पिंपरी (प्रतिनिधी) दि. २७ जुलै २०२६ : पुणे मेट्रो टप्पा-२ अंतर्गत प्रस्तावित भक्ती-शक्ती चौक (निगडी) ते चाकण मेट्रो मार्गाला महत्त्वाची गती मिळाली आहे. महामेट्रोच्या फुगेवाडी येथील कार्यालयात आयोजित बैठकीत या मार्गाचा सुधारित सविस्तर प्रकल्प अहवाल (DPR) सादर करण्यात आला. या प्रकल्पामुळे पिंपरी-चिंचवड शहरासह चाकण औद्योगिक परिसरातील सार्वजनिक वाहतुकीला मोठी चालना मिळणार असून, भविष्यातील विकासाची ही महत्त्वाची जीवनवाहिनी ठरणार आहे.
महामेट्रोचे व्यवस्थापकीय संचालक श्रावणजी हर्डीकर यांनी सुधारित डीपीआर सादर केला. या सुधारित आराखड्यानुसार प्रकल्पाची अंदाजित किंमत ₹१२,९३७.२३ कोटी, एकूण लांबी ४५.२९५ किलोमीटर आणि ३४ स्थानके प्रस्तावित करण्यात आली आहेत. संपूर्ण मार्ग एलिव्हेटेड (उन्नत) स्वरूपात उभारण्यात येणार आहे.
बैठकीला पिंपरी-चिंचवडचे महापौर रवी लांडगे, उपमहापौर शर्मिलाताई बाबर, आमदार महेश लांडगे, उमाताई खापरे, पक्षनेते प्रशांत शितोळे, स्थायी समिती अध्यक्ष अभिषेक बारणे, अतिरिक्त आयुक्त तृप्ती सांडभोर तसेच UMTC चे सल्लागार रजनीश पोडवळ यांच्यासह संबंधित अधिकारी उपस्थित होते.
प्रस्तावित ३४ मेट्रो स्थानके….
भक्ती-शक्ती, ट्रान्सपोर्ट नगर, गणेश नगर, आदर्श नगर, मुकाई चौक, रावेत, पुनावळे गाव, पुनावळे, ताथवडे गाव, ताथवडे, भूमकर चौक, भुजबळ चौक, वाकड, विशाल नगर कॉर्नर, कोकणे चौक, पिंपळे सौदागर, पिंपळे गुरव, नाशिक फाटा, संत तुकाराम नगर, वल्लभनगर, गवळी माथा चौक, सेंच्युरी एन्का कॉर्नर, लांडेवाडी, भोसरी गाव, भोसरी सेक्टर-१, गोडाऊन चौक, PIECC, भारत माता मोशी, चिंबळी फाटा, बारगे वस्ती, कुरुळी, आळंदी फाटा, नाणेकरवाडी आणि चाकण.
प्रकल्पाचे प्रमुख फायदे…..
💮निगडी ते चाकण प्रवास अधिक वेगवान व सुलभ होणार.
💮वाकड, नाशिक फाटा, भोसरी, मोशी आणि चाकण परिसरातील वाहतूक कोंडी कमी होण्यास मदत होणार.
💮चाकण औद्योगिक क्षेत्रातील कामगार व कर्मचाऱ्यांना सक्षम सार्वजनिक वाहतुकीचा पर्याय उपलब्ध होणार.
💮विद्यार्थी, महिला, ज्येष्ठ नागरिक आणि दैनंदिन प्रवाशांना सुरक्षित व विश्वासार्ह प्रवासाची सुविधा मिळणार.
💮वेगाने विकसित होणाऱ्या परिसरांना थेट मेट्रो कनेक्टिव्हिटी मिळणार.
💮खासगी वाहनांचा वापर कमी होऊन वाहतूक कोंडी व प्रदूषणावर नियंत्रण मिळविण्यास मदत होणार.
💮निवासी, व्यावसायिक आणि औद्योगिक विकासाला मोठी चालना मिळणार.
सुधारित डीपीआरला आवश्यक त्या शासकीय मंजुरी मिळाल्यानंतर या महत्त्वाकांक्षी प्रकल्पाच्या प्रत्यक्ष कामाला लवकर प्रारंभ व्हावा, अशी नागरिकांची अपेक्षा आहे. निगडी ते चाकण मेट्रो मार्गाच्या दिशेने आजची बैठक हा एक महत्त्वपूर्ण टप्पा मानला जात असून, भविष्यात पिंपरी-चिंचवड आणि चाकण परिसरातील प्रवास अधिक वेगवान, सुरक्षित आणि आधुनिक होण्याचा मार्ग मोकळा होणार आहे.
