सामाजिक व राजकीय संघटनांची पोलीस आयुक्तांकडे संयुक्त मागणी; निष्काळजी अधिकाऱ्यांवर कठोर कारवाईची मागणी
पिंपरी, प्रतिनिधी : मोशी कचरा डेपो येथे ८ जुलै २०२६ रोजी झालेल्या भीषण दुर्घटनेत नऊ निष्पाप सफाई कामगारांचा मृत्यू झाल्याप्रकरणी जबाबदार सर्व अधिकारी, संबंधित ठेकेदार आणि दोषींवर सदोष मनुष्यवधासह लागू कायद्यानुसार तात्काळ गुन्हे दाखल करावेत, अशी संयुक्त मागणी विविध सामाजिक व राजकीय संघटनांच्या पदाधिकाऱ्यांनी पिंपरी-चिंचवडचे पोलीस आयुक्त यांच्याकडे निवेदनाद्वारे केली आहे.
निवेदनात म्हटले आहे की, कचऱ्याची नियमबाह्य साठवण, आवश्यक सुरक्षा उपाययोजनांचा अभाव, कर्तव्यातील हलगर्जीपणा आणि संबंधित यंत्रणांच्या कथित निष्काळजीपणामुळे कचऱ्याचा प्रचंड ढीग कोसळून इमारत जमीनदोस्त झाली. या दुर्घटनेत नऊ निष्पाप कामगारांना जीव गमवावा लागला. त्यामुळे ही घटना केवळ अपघात नसून गंभीर निष्काळजीपणाचे परिणाम असल्याचा आरोप करण्यात आला आहे.
या प्रकरणात पिंपरी-चिंचवड महापालिकेतील पर्यावरण विभागाचे अभियंता संजय कुलकर्णी, योगेश आल्हाट, बांधकाम परवाना विभाग, अतिक्रमण विभागातील संबंधित अधिकारी, ठेकेदार अँथनी लारा कंपनीचे जबाबदार अधिकारी तसेच चौकशीत दोषी आढळणाऱ्या इतर सर्व संबंधितांविरुद्ध तात्काळ गुन्हे दाखल करून कठोर कारवाई करावी, अशी मागणी करण्यात आली आहे.
भविष्यात अशा प्रकारच्या दुर्घटनांची पुनरावृत्ती होऊ नये, सार्वजनिक यंत्रणांमध्ये जबाबदारीची भावना निर्माण व्हावी आणि कर्तव्यात कसूर करणाऱ्यांवर कायद्याचा धाक राहावा, यासाठी निष्पक्ष व पारदर्शक चौकशी करून दोषींना कठोर शिक्षा व्हावी, अशीही मागणी निवेदनात करण्यात आली आहे.
हे निवेदन ज्येष्ठ सामाजिक कार्यकर्ते मानव कांबळे, मारुती भापकर, काँग्रेसचे शहराध्यक्ष नरेंद्र बनसोडे, शिवसेनेचे शहरप्रमुख चेतन पवार, मनसेचे शहरप्रमुख सचिन चिखले, आम आदमी पार्टीचे युवक अध्यक्ष विकी पासोटे, मराठा सेवा संघाचे कार्याध्यक्ष प्रकाश जाधव, संभाजी ब्रिगेडचे पुणे जिल्हाध्यक्ष प्रवीण कदम, संभाजी ब्रिगेडचे अध्यक्ष सतीश काळे तसेच छावा मराठा युवा महासंघाचे अध्यक्ष धनाजी येळकर पाटील यांच्या स्वाक्षरीने देण्यात आले आहे.
