२२ ते २८ जुलैदरम्यान शहरभर विशेष स्वच्छता मोहीम; प्रत्येक प्रभागात उपआयुक्तांवर जबाबदारी निश्चित करण्याची मागणी
पिंपरी, दि. २० जुलै : पिंपरी-चिंचवड शहराचे शिल्पकार तथा महाराष्ट्राचे लाडके माजी उपमुख्यमंत्री स्व. अजितदादा पवार यांच्या जयंतीनिमित्त दि. २२ जुलै ते २८ जुलै २०२६ या कालावधीत संपूर्ण शहरात “स्वच्छता सप्ताह” राबविण्यात यावा, अशी मागणी पिंपरी-चिंचवड महानगरपालिकेकडे करण्यात आली आहे.
निवेदनात म्हटले आहे की, स्व. अजितदादा पवार यांनी पिंपरी-चिंचवडच्या विकासासाठी दिलेले योगदान ऐतिहासिक असून त्यांच्या कार्याची प्रेरणा जपण्यासाठी शहरभर विशेष स्वच्छता अभियान राबविणे हीच त्यांना खरी आदरांजली ठरेल. पुणे महानगरपालिकेच्या धर्तीवर हा उपक्रम प्रभावीपणे राबविण्याची आवश्यकता व्यक्त करण्यात आली आहे.
स्वच्छता सप्ताहांतर्गत प्रत्येक प्रभागामध्ये नाले व गटारांची साफसफाई, ड्रेनेज चोकअप दूर करणे, ओला व सुका कचरा संकलन, राडारोडा उचलणे, डास प्रतिबंधक औषध फवारणी, रस्त्यांवरील फ्लुरोसंट पेंट मार्किंग, सार्वजनिक ठिकाणांची स्वच्छता तसेच नागरिकांच्या आरोग्याच्या दृष्टीने व्यापक स्वच्छता मोहीम हाती घेण्यात यावी, अशी मागणी करण्यात आली आहे.
यासोबतच या मोहिमेच्या प्रभावी अंमलबजावणीसाठी प्रत्येक विभागाची जबाबदारी उपआयुक्त दर्जाच्या अधिकाऱ्यांवर निश्चित करण्यात यावी. २२ ते २८ जुलै या संपूर्ण कालावधीत दररोज कामांचा आढावा घेऊन शहर स्वच्छ, सुंदर आणि आरोग्यदायी बनविण्यासाठी विशेष प्रयत्न करावेत, असेही निवेदनात नमूद करण्यात आले आहे.
या उपक्रमामुळे शहरातील स्वच्छतेबाबत जनजागृती होण्यास मदत होईल, तसेच नागरिकांमध्ये स्वच्छतेबाबत सकारात्मक संदेश जाईल. त्यामुळे महापालिकेने या मागणीची तातडीने दखल घेऊन “स्वच्छता सप्ताह” जाहीर करावा, अशी अपेक्षा व्यक्त करण्यात आली आहे.
