गुन्हे शाखेच्या अंमली पदार्थ विरोधी पथकाचा पुढाकार; विद्यार्थ्यांना व्यसनमुक्तीचा संदेश
पिंपरी, दि.१७ जुलै: पिंपरी-चिंचवड पोलीस आयुक्तालयाच्या गुन्हे शाखेतील अंमली पदार्थ विरोधी पथकाच्या वतीने डॉ. डी. वाय. पाटील आर्ट्स, कॉमर्स अँड सायन्स कॉलेज, पिंपरी येथे महाविद्यालयीन विद्यार्थी व शिक्षकांसाठी “अंमली पदार्थांच्या दुष्परिणामांसंदर्भात विशेष जनजागृती मार्गदर्शन कार्यशाळा” आयोजित करण्यात आली. या कार्यशाळेत विद्यार्थ्यांना अंमली पदार्थांचे शारीरिक, मानसिक, सामाजिक व कायदेशीर दुष्परिणामांची सविस्तर माहिती देत व्यसनमुक्त जीवनाचा संदेश देण्यात आला.
पोलीस आयुक्त विनयकुमार चौबे, पोलीस सहआयुक्त शशिकांत महावरकर आणि अपर पोलीस आयुक्त (गुन्हे) सारंग आवाड यांच्या मार्गदर्शनाखाली शहरातील अंमली पदार्थांच्या अवैध विक्रीवर आळा घालणे आणि नागरिकांमध्ये अंमली पदार्थ तसेच तंबाखूजन्य पदार्थांच्या दुष्परिणामांविषयी व्यापक जनजागृती करण्याच्या उद्देशाने हा उपक्रम राबविण्यात आला.
पोलीस उप आयुक्त (गुन्हे) रोहिदास पवार आणि सहायक पोलीस आयुक्त (गुन्हे-२) सचिन कदम यांच्या मार्गदर्शनाखाली आयोजित कार्यशाळेत सहायक पोलीस आयुक्त सचिन कदम यांनी पॉवर पॉइंट प्रेझेंटेशनच्या माध्यमातून विविध प्रकारचे अंमली पदार्थ, त्यांच्या सेवनामुळे होणारे दुष्परिणाम तसेच एनडीपीएस कायद्यातील प्रमुख तरतुदी यांची माहिती दिली.
यावेळी त्यांनी अंमली पदार्थांचे व्यसन केवळ व्यक्तीचे आरोग्यच नव्हे, तर त्याचे कुटुंब, शिक्षण, करिअर आणि संपूर्ण समाज उद्ध्वस्त करू शकते, असे सांगून विद्यार्थ्यांनी शिक्षण, क्रीडा, संस्कार आणि सकारात्मक जीवनमूल्यांचा स्वीकार करण्याचे आवाहन केले. तसेच अंमली पदार्थांबाबत कोणतीही माहिती मिळाल्यास अंमली पदार्थ विरोधी पथकाच्या ८६००००२३२०, मानस हेल्पलाईन १९३३ किंवा पोलीस नियंत्रण कक्ष ११२ या क्रमांकावर माहिती देण्याचे आवाहन करत माहिती देणाऱ्याचे नाव गोपनीय ठेवले जाईल, असेही स्पष्ट केले.
कार्यक्रमात राष्ट्रीय तंबाखू नियंत्रण कार्यक्रम, औंध रुग्णालयाचे मानसोपचार तज्ज्ञ हनुमंत हाडे यांनी तंबाखूच्या सेवनामुळे होणाऱ्या गंभीर आरोग्यविषयक दुष्परिणामांवर मार्गदर्शन केले. तसेच विमल व्यसनमुक्ती केंद्राचे व्यवस्थापक व समुपदेशक विल्यम साळवी यांनी व्यसनमुक्त जीवनाचे महत्त्व पटवून देत विद्यार्थी व शिक्षकांना कोणत्याही प्रकारच्या अंमली पदार्थांपासून दूर राहण्याची शपथ दिली.
कार्यक्रमाचे प्रास्ताविक व सूत्रसंचालन पोलीस अंमलदार कपिलेश इगवे यांनी केले. या जनजागृती कार्यशाळेत सुमारे २५० ते ३०० विद्यार्थी व शिक्षकांनी उत्स्फूर्त सहभाग नोंदविला.
अंमली पदार्थ विरोधी पथक, गुन्हे शाखेच्या वतीने राबविण्यात येणारा हा जनजागृती उपक्रम शहरात व्यसनमुक्त समाज घडविण्याच्या दिशेने महत्त्वाचे पाऊल ठरत असल्याचे यावेळी सांगण्यात आले.
