मुख्य अभियंता संजय कुलकर्णी, कार्यकारी अभियंता योगेश आल्हाट निलंबित
९ कामगारांच्या मृत्यूप्रकरणी विभागीय चौकशीचे आदेश; आयुक्त डॉ. विजय सूर्यवंशी यांची कठोर कारवाई
पिंपरी-चिंचवड | प्रतिनिधी…..मोशी कचरा डेपो येथे ८ जुलै २०२६ रोजी झालेल्या भीषण दुर्घटनेनंतर पिंपरी-चिंचवड महापालिकेने मोठी प्रशासकीय कारवाई करत पर्यावरण व अभियांत्रिकी विभागाचे मुख्य अभियंता-१ संजय नारायण कुलकर्णी आणि कार्यकारी अभियंता योगेश आल्हाट यांना तात्काळ प्रभावाने सेवानिलंबित केले आहे. दोन्ही अधिकाऱ्यांविरोधात विभागीय चौकशीचे आदेशही देण्यात आले असून, महापालिका आयुक्त डॉ. विजय सूर्यवंशी यांनी ही कारवाई केली आहे.
महापालिकेच्या आदेशानुसार, मोशी कचरा डेपोतील कचऱ्याचा प्रचंड ढिगारा घसरून आरसीसी इमारतीवर कोसळल्याने नऊ निष्पाप कंत्राटी कामगारांचा दुर्दैवी मृत्यू झाला. या दुर्घटनेमागे कामकाजातील शिथिल पर्यवेक्षण, सुरक्षा उपाययोजनांकडे झालेले दुर्लक्ष आणि कर्तव्यातील गंभीर कसूर कारणीभूत ठरल्याचा प्राथमिक निष्कर्ष प्रशासनाने नोंदविला आहे.
या प्रकरणी यापूर्वी दोन्ही अधिकाऱ्यांना कारणे दाखवा नोटीस बजावून खुलासा मागविण्यात आला होता. मात्र, त्यांनी सादर केलेला खुलासा असमाधानकारक, तथ्यहीन आणि शासन तसेच महापालिकेच्या नियमांशी विसंगत असल्याचे प्रशासनाच्या निदर्शनास आले. त्यामुळे दोघांवरही गंभीर निष्काळजीपणा आणि अक्षम्य हलगर्जीपणाचा ठपका ठेवत सेवानिलंबनाची कारवाई करण्यात आली.
आदेशात नमूद केल्यानुसार, कार्यकारी अभियंता योगेश आल्हाट यांच्याकडे कचरा डेपोतील दैनंदिन कामकाजाचे पर्यवेक्षण, कचऱ्याच्या ढिगाऱ्यांची स्थिती तपासणे आणि परिसरातील सुरक्षेच्या उपाययोजनांची प्रत्यक्ष अंमलबजावणी करण्याची जबाबदारी होती. मात्र, या जबाबदाऱ्यांकडे दुर्लक्ष झाल्यामुळेच ही दुर्घटना घडल्याचे प्राथमिक तपासात समोर आले आहे. तसेच पर्यावरणीय नियमांचे उल्लंघन, सार्वजनिक सुरक्षेबाबत आवश्यक दक्षता न घेणे आणि त्यातून नऊ कामगारांचा मृत्यू झाल्याचा ठपकाही आदेशात ठेवण्यात आला आहे.
🔴पहिल्या तीन महिन्यांसाठी नियमानुसार उपजीविका भत्ता देण्यात येणार.🔴त्यानंतर नियमांनुसार सुधारित उपजीविका भत्ता लागू राहणार.🔴सेवानिलंबनाच्या काळात कोणतीही नोकरी किंवा व्यवसाय करता येणार नाही.🔴दरमहा स्वघोषणापत्र सादर करणे बंधनकारक राहील.मुख्यालय पिंपरी येथेच राहावे लागेल.🔴वरिष्ठांच्या परवानगीशिवाय मुख्यालय सोडता येणार नाही.🔴निलंबन आदेशाची नोंद संबंधित अधिकाऱ्यांच्या सेवापुस्तकात करण्यात येणार.या सेवा निलंबनाच्या अटी असणार आहेत
मोशी कचरा डेपो दुर्घटनेनंतर जबाबदार अधिकाऱ्यांवर कारवाईची प्रक्रिया वेगाने सुरू झाली असून, विभागीय चौकशीचा अहवाल आल्यानंतर आणखी काही अधिकारी किंवा संबंधितांवरही कठोर कारवाई होण्याची शक्यता वर्तविली जात आहे. त्यामुळे या बहुचर्चित दुर्घटनेतील पुढील घडामोडींकडे संपूर्ण पिंपरी-चिंचवडचे लक्ष लागले आहे.
