सर्वसाधारण सभेत भाजप नगरसेवक निखिल बोऱ्हाडे आक्रमक; “एकही कचऱ्याची गाडी येऊ देणार नाही” नगरसेवक निखिल बोऱ्हाडेंचा इशारा
पिंपरी-चिंचवड, : मोशी कचरा डेपोच्या प्रश्नावर भाजपचे नगरसेवक निखिल बोऱ्हाडे यांनी महापालिकेच्या सर्वसाधारण सभेत आक्रमक भूमिका घेत प्रशासनासह राजकीय नेतृत्वालाच धारेवर धरले. महापौर रवि लांडगे आणि महापालिका आयुक्त डॉ. विजय सूर्यवंशी यांच्या उपस्थितीत त्यांनी मोशीवरील वाढत्या कचऱ्याच्या भाराचा मुद्दा सभागृहात जोरदारपणे मांडला.
“आमच्या मोशीगावाने संपूर्ण महापालिकेचा ठेका घेतला आहे का? आमच्या गावाला श्रद्धांजली वाहण्याची वेळ आली आहे,” अशा तीव्र शब्दांत बोऱ्हाडे यांनी संताप व्यक्त करत मोशीतील नागरिकांच्या व्यथा मांडल्या. खडकी डेपोतील कचरा पिंपरी-चिंचवड महापालिका हद्दीत का आणला जात आहे आणि त्यासाठी जबाबदार कोण, असा थेट सवाल त्यांनी प्रशासनाला केला.
मोशी परिसरातील नळ आणि बोअरवेलमधून दूषित पाणी येत असल्याने नागरिकांच्या आरोग्याचा गंभीर प्रश्न निर्माण झाला असून अनेकजण आजारी पडत असल्याचा दावा त्यांनी केला. या गंभीर परिस्थितीसाठी प्रशासनासह सर्वच राजकीय नेतृत्व जबाबदार असल्याची टीकाही त्यांनी केली.
यावेळी बोऱ्हाडे यांनी कठोर भूमिका जाहीर करत, “आता मोशीत एकही कचऱ्याची गाडी येऊ देणार नाही,” असा स्पष्ट इशारा दिला. पुनावळे येथील नियोजित जागेचा तातडीने ताबा घेऊन तेथे नवीन कचरा डेपो सुरू करावा, अशी मागणी त्यांनी केली.
शहरातील किमान दहा प्रभागांमध्ये स्वतंत्र कचरा डेपो उभारण्यात यावेत, ‘वेस्ट टू एनर्जी’ प्रकल्प राबवून कचरा व्यवस्थापनाचे विकेंद्रीकरण करण्यात यावे आणि त्यासाठी विकास आराखड्यात आवश्यक तरतूद करण्यात यावी, अशी मागणीही त्यांनी सभागृहात केली.
मोशी कचरा डेपोचा प्रश्न पुन्हा एकदा सर्वसाधारण सभेत ऐरणीवर आल्याने येत्या काळात महापालिका प्रशासन यावर कोणती ठोस भूमिका घेते, याकडे शहरवासीयांचे लक्ष लागले आहे.
