राज्याबाहेर असल्याने घटनास्थळी पोहोचता आले नाही; नागरिकांची मागितली दिलगिरी
पिंपरी चिंचवड…..मोशी कचरा डेपो येथे झालेल्या भीषण दुर्घटनेप्रकरणी पिंपरी-चिंचवड महापालिकेचे विरोधी पक्षनेते भाऊसाहेब सोपानराव भोईर यांनी तीव्र संताप व्यक्त करत या दुर्घटनेस जबाबदार असलेल्या सर्व संबंधितांवर सदोष मनुष्यवधाचा गुन्हा दाखल करण्याची ठाम मागणी केली आहे. पीडित कुटुंबांना न्याय आणि योग्य भरपाई मिळेपर्यंत आपण स्वस्थ बसणार नसल्याचा निर्धारही त्यांनी व्यक्त केला.
प्रसिद्धीस दिलेल्या निवेदनात भोईर म्हणाले की, मोशी कचरा डेपोतील दुर्घटना अत्यंत दुर्दैवी, धक्कादायक आणि मन हेलावून टाकणारी आहे. या घटनेत बाधित झालेल्या प्रत्येक नागरिकाप्रती त्यांनी तीव्र शोक व्यक्त केला असून, मृतांना भावपूर्ण श्रद्धांजली अर्पण केली आहे. तसेच जखमी नागरिकांनी लवकरात लवकर बरे व्हावे, अशी प्रार्थना करत पीडित कुटुंबांच्या दुःखात आपण सहभागी असल्याचे त्यांनी नमूद केले.
पूर्वनियोजित कामानिमित्त ७ जुलैपासून राज्याबाहेर असल्यामुळे ८ जुलै रोजी दुर्घटना घडल्यानंतर तातडीने घटनास्थळी पोहोचता आले नाही, याबद्दल त्यांनी नागरिकांची दिलगिरी व्यक्त केली. मात्र, प्रत्यक्ष उपस्थित नसतानाही संपूर्ण परिस्थितीवर आपले सातत्याने लक्ष असून बचावकार्याबाबत संबंधित यंत्रणांशी संपर्क कायम असल्याचे त्यांनी स्पष्ट केले.
सध्या एनडीआरएफ, अग्निशमन दल, लष्कर आणि इतर बचाव यंत्रणांकडून युद्धपातळीवर मदतकार्य सुरू असून, ढिगाऱ्याखाली अडकलेल्या नागरिकांना सुखरूप बाहेर काढण्यासाठी प्रत्येक क्षण महत्त्वाचा असल्याचे त्यांनी सांगितले. प्रशासनाने उपलब्ध सर्व मनुष्यबळ आणि यंत्रसामग्रीचा वापर करून बचावकार्याला सर्वोच्च प्राधान्य द्यावे, अशी मागणीही त्यांनी केली.
अशा संवेदनशील प्रसंगी राजकारण करण्यापेक्षा सर्वांनी बचाव यंत्रणांना सहकार्य करून पीडितांच्या पाठीशी उभे राहणे आवश्यक असल्याचे आवाहन त्यांनी केले.
या दुर्घटनेची केवळ औपचारिक चौकशी करून चालणार नाही. कर्तव्यात कसूर करणारे अधिकारी, कर्मचारी तसेच या दुर्घटनेस जबाबदार असलेल्या सर्व संबंधितांवर सदोष मनुष्यवधासह लागू असलेल्या कायदेशीर कलमान्वये कठोर गुन्हे दाखल करण्यात यावेत, अशी ठाम मागणी त्यांनी केली.
शहरात परतल्यानंतर संपूर्ण प्रकरणाचा वैयक्तिक पातळीवर सखोल आढावा घेणार असून, दोषींवर कठोर कारवाई होईपर्यंत आणि पीडित कुटुंबांना न्याय मिळेपर्यंत सातत्याने पाठपुरावा करणार असल्याचा शब्दही त्यांनी दिला.
भविष्यात अशा दुर्घटना टाळण्यासाठी मोशी कचरा डेपोच्या संपूर्ण व्यवस्थापन, सुरक्षितता आणि आपत्ती प्रतिबंधक यंत्रणेची सर्वंकष पुनर्रचना करण्यात यावी, अशी मागणीही त्यांनी प्रशासनाकडे केली.
