पुणे (तळेगाव दाभाडे) : तळेगाव दाभाडे पोलीस ठाण्याच्या हद्दीत जुन्या पुणे-मुंबई महामार्गावर सीआरपीएफ गेटजवळ सार्वजनिक ठिकाणी वेश्याव्यवसायासाठी ग्राहकांना आमिष दाखवत असल्याप्रकरणी एका महिलेविरुद्ध गुन्हा दाखल करण्यात आला आहे. याप्रकरणी तळेगाव दाभाडे पोलीस ठाण्यात गुन्हा क्रमांक २१५/२०२६ अन्वये अनैतिक व्यापारास प्रतिबंध अधिनियम १९५६ चे कलम ८ नुसार कारवाई करण्यात आली आहे.
पोलिसांनी दिलेल्या माहितीनुसार, दि. २० जून २०२६ रोजी रात्री ८.१५ वाजण्याच्या सुमारास जुना पुणे-मुंबई हायवे रोड, सीआरपीएफ गेटच्या बाजूला रस्त्यालगत वडाच्या झाडाखाली, तळेगाव दाभाडे ता. मावळ जि. पुणे येथे संबंधित महिला सार्वजनिक ठिकाणी उभी राहून वेश्याव्यवसाय करण्याच्या उद्देशाने लैंगिक हावभाव करत तसेच शब्द उच्चारून येणाऱ्या-जाणाऱ्या लोकांना अडथळा निर्माण करत असल्याचे आढळून आले.
सदर प्रकारामुळे सार्वजनिक शिष्टाचार आणि सभ्यतेचा भंग होईल असे कृत्य केल्याचा ठपका ठेवत पोलिसांनी संबंधित महिलेविरुद्ध गुन्हा नोंदविला. या प्रकरणात दि. २१ जून २०२६ रोजी सकाळी ८ वाजता गुन्हा दाखल करण्यात आला असून महिला आरोपीला नोटीस देण्यात आली आहे.या घटनेचा पुढील तपास पोलीस हवालदार १४८८ सूर्यवंशी हे करत आहेत.
