पुणे, ता. खेड (म्हाळुंगे एमआयडीसी), दि. २३ जून – खेड तालुक्यातील सावरदरी गावठाण ग्रामपंचायत शेजारी असलेल्या मोरया गॅस सर्व्हिसेस येथे घरगुती गॅस सिलेंडरमधून अवैधरित्या गॅस भरताना एक जण पोलिसांच्या ताब्यात आढळून आला. या प्रकरणी म्हाळुंगे एमआयडीसी पोलिस ठाण्यात गुन्हा दाखल करण्यात आला असून आरोपीला अटक करण्यात आली आहे.
पोलिसांनी दिलेल्या माहितीनुसार, दि. २० जून २०२६ रोजी रात्री ८.३० वाजण्याच्या सुमारास सावरदरी गावठाण ग्रामपंचायत शेजारील मोरया गॅस सर्व्हिसेस येथे ही कारवाई करण्यात आली. यावेळी आरोपी पवन महादेव सातपुते (वय २१, रा. सावरदरी, ता. खेड, जि. पुणे) हा घरगुती वापराच्या भरलेल्या सिलेंडरमधून मोकळ्या सिलेंडरमध्ये गॅस भरताना आढळून आला.
या प्रकारामुळे लोकांच्या जीवितास धोका निर्माण होऊ शकतो, हे माहिती असूनही ज्वालाग्राही पदार्थांच्या सुरक्षिततेबाबत आवश्यक ती खबरदारी न घेतल्याचा आरोप आरोपीवर ठेवण्यात आला आहे. पोलिसांनी घटनास्थळावरून एकूण ३१ हजार ६०० रुपयांचे घरगुती गॅस सिलेंडर जप्त केल्याची माहिती आहे.
या प्रकरणी समीर शब्बीर महात (वय २३), पोलीस कॉन्स्टेबल, बकल नं. ४६३३, नेमणूक – म्हाळुंगे एमआयडीसी पोलीस ठाणे यांनी फिर्याद दिली आहे. त्यानुसार म्हाळुंगे एमआयडीसी पोलिस ठाण्यात गुन्हा क्रमांक ५५४/२०२६ दाखल करण्यात आला आहे. हा गुन्हा भारतीय न्याय संहिता कलम २८७, २८८, तसेच जीवनावश्यक वस्तू कायदा १९५५ चे कलम ३ व ७ आणि पुरवठा व वितरण नियमन आदेश २००० मधील कलम ३, ४, ५, ६ अंतर्गत नोंदविण्यात आला आहे.या प्रकरणाचा पुढील तपास पोलीस करत आहेत.
