शेअर बाजार आणि भिशीमध्ये गुंतवणूकदारांना महिन्याला ५ टक्के परताव्याचे स्वप्न दाखवून फसवणूक; एकाच कुटुंबातील चौघे आर्थिक गुन्हे शाखेच्या जाळ्यात
पिंपरी, दि. २१ जून – शेअर मार्केटमध्ये कमी कालावधीत मोठा नफा मिळवून देण्याचे, तसेच भिशीमध्ये पैसे गुंतवल्यास दरमहा ४ ते ५ टक्के परतावा देण्याचे आमिष दाखवत गुंतवणूकदारांना तब्बल ५ कोटी ३ लाख १४ हजार ३६८ रुपयांचा गंडा घालणाऱ्या एकाच कुटुंबातील चौघांना पिंपरी-चिंचवड पोलीस आयुक्तालयाच्या आर्थिक गुन्हे शाखेने बेड्या ठोकल्या आहेत. या कारवाईमुळे गुंतवणुकीच्या नावाखाली उभा करण्यात आलेला मोठा फसवणुकीचा डाव उघडकीस आला आहे.
अटक करण्यात आलेल्यांमध्ये रमेश पुंजा आहेरकर, छाया रमेश आहेरकर, वेदांत रमेश आहेरकर आणि आदित्य रमेश आहेरकर यांचा समावेश आहे. आरोपींनी ‘वेदांत फायनान्स सर्व्हिसेस’, ‘त्रिवेणी पूजा भांडार’ आणि ‘आदित्य इंटरप्रायझेस’ या फर्मच्या माध्यमातून गुंतवणूकदारांना जाळ्यात ओढल्याचे तपासात समोर आले आहे.
पोलीसांनी दिलेल्या माहितीनुसार, आरोपींनी फिर्यादी व इतर गुंतवणूकदारांना “शेअर मार्केटमध्ये सुरक्षित गुंतवणूक”, “भिशीत मोठा नफा” आणि “नियमित मासिक परतावा” अशा गोड बोलांनी भुरळ घातली. गुंतवणूकदारांकडून मोठ्या प्रमाणात रक्कम उभी केल्यानंतर कोणताही परतावा न देता विश्वासघात करण्यात आला. या प्रकरणात फिर्यादी व इतर गुंतवणूकदारांची ४ कोटी १८ लाख २० हजार ८९० रुपयांची फसवणूक झाल्याचे उघड झाले आहे; तर एकूण व्यवहाराची रक्कम ५.०३ कोटींवर गेल्याचे पोलिस तपासात स्पष्ट झाले आहे.
या प्रकरणी हनुमंत भागवत जाधव यांनी दिलेल्या फिर्यादीवरून हिंजवडी पोलीस ठाण्यात गुन्हा रजिस्टर क्रमांक १४३/२०२६ दाखल करण्यात आला. भारतीय न्याय संहिता २०२३ मधील कलम ११२, ३१६ (२), ३१८ (४), ३ (५) तसेच महाराष्ट्र ठेवीदारांचे हितसंरक्षण अधिनियम १९९९ अंतर्गत आरोपींवर गुन्हा नोंदवण्यात आला आहे.
गुन्हा दाखल झाल्याची चाहूल लागताच आरोपींनी हिंजवडी येथील राहते घर बंद करून आपले अस्तित्व लपवण्याचा प्रयत्न केला. मात्र आर्थिक गुन्हे शाखेने तांत्रिक विश्लेषण, गोपनीय माहिती आणि कसून तपासाच्या आधारे आरोपींचा माग काढत नेवासा, जि. अहिल्यानगर येथून चौघांनाही अटक केली. न्यायालयाने त्यांना २२ जून २०२६ पर्यंत पोलीस कोठडी सुनावली असून पुढील तपास वेगाने सुरू आहे.
तपासादरम्यान आरोपींच्या वेदांत फायनान्शियल सर्व्हिसेस आणि आदित्य इंटरप्रायझेस या फर्मसह इतर वैयक्तिक अशा एकूण ११ बँक खाती डेबिट फ्रीज करण्यात आली आहेत. याशिवाय आरोपींच्या चल-अचल मालमत्तेचा शोध घेण्याचे कामही आर्थिक गुन्हे शाखेकडून सुरू आहे. पोलिसांच्या या कारवाईमुळे फसवणुकीतून उभारलेली मालमत्ता आणि आर्थिक व्यवहारांची साखळी उलगडण्याची शक्यता आहे.
पिंपरी-चिंचवड पोलीस आयुक्तालयाच्या आर्थिक गुन्हे शाखेने या प्रकरणात जाहीर आवाहन केले असून, ‘वेदांत फायनान्स सर्व्हिसेस’, ‘त्रिवेणी पूजा भांडार’ किंवा ‘आदित्य इंटरप्रायझेस’ या फर्ममार्फत कोणाची फसवणूक झाली असल्यास त्यांनी तातडीने आर्थिक गुन्हे शाखेशी संपर्क साधावा, असे आवाहन करण्यात आले आहे.
या गुन्ह्याचा तपास पोलीस आयुक्त विनयकुमार चौबे, पोलीस सहआयुक्त शशिकांत महावरकर, अपर पोलीस आयुक्त डॉ. बसवराज तेली, पोलीस उपआयुक्त रोहिदास पवार, सहाय्यक पोलीस आयुक्त विशाल हिरे यांच्या मार्गदर्शनाखाली पार पडला. या कारवाईत आर्थिक गुन्हे शाखेच्या वरिष्ठ पोलीस निरीक्षक वनिता धुमाळ, पोलीस निरीक्षक सचिन शिर्के, सहायक पोलीस निरीक्षक युवराज कलकुटगे, पोलीस कॉन्स्टेबल सिद्धेश्वर सोनटक्के, आकाश पारधी आणि प्रिया वसावे यांनी मोलाची भूमिका बजावली.
या कारवाईनंतर पोलीस आयुक्त विनयकुमार चौबे यांनी नागरिकांना सावध राहण्याचे आवाहन केले आहे. “शेअर मार्केटमध्ये कमी कालावधीत प्रचंड नफा, अल्पावधीत दुप्पट-तिप्पट परतावा किंवा अनधिकृत भिशी योजनांचे आमिष दाखवले जात असेल, तर नागरिकांनी अशा योजनांपासून दूर राहावे. गुंतवणुकीपूर्वी संबंधित संस्था, फर्म किंवा व्यक्तीची संपूर्ण पडताळणी करणे आवश्यक आहे,” असे त्यांनी स्पष्ट केले.
