सोनसाखळी चोऱ्या (चैन स्नॅचिंग) करणारी टोळी जेरबंद, २.६५ लाखांचा मुद्देमाल जप्त
पिंपरी, दि.१७ जून : रावेत परिसरात महिलांच्या गळ्यातील सोन्याचे दागिने हिसकावून पळ काढणाऱ्या सराईत चैन स्नॅचर टोळीचा पर्दाफाश करण्यात रावेत पोलिसांना यश आले आहे. या कारवाईत दोन आरोपींना अटक करण्यात आली असून त्यांच्याकडून एकूण २ लाख ६५ हजार रुपयांचा मुद्देमाल जप्त करण्यात आला आहे.
रावेत पोलीस ठाण्यात गुन्हा क्रमांक १९८/२०२६ भारतीय न्याय संहिता कलम ३०९ (४), ३ (५) अन्वये दाखल करण्यात आला होता. फिर्यादी कविता मिलिंद केसरकर (वय ५५) या २ जून २०२६ रोजी सायंकाळी पतीसोबत पायी फिरत असताना नव्यम कन्स्ट्रक्शन साईटजवळ अज्ञात दुचाकीस्वारांनी त्यांच्या गळ्यातील मिनी गंठण हिसकावून नेले होते.
या गुन्ह्याचा तपास करताना वरिष्ठ पोलीस निरीक्षक नितीन फटांगरे यांच्या मार्गदर्शनाखाली तपास पथकाने घटनास्थळ परिसरातील सीसीटीव्ही फुटेज, तांत्रिक विश्लेषण आणि गुप्त माहितीच्या आधारे आरोपींपर्यंत पोहोचण्यात यश मिळविले. पोलीस शिपाई अजित बेंडभर व विनोद कदम यांनी आरोपींचा माग काढून त्यांना ताब्यात घेतले.
तपासादरम्यान आदित्य परशुराम मनलोर (वय १९, रा. पाटील इस्टेट, शिवाजीनगर, पुणे) आणि त्याचा साथीदार फिदा मनुआली इराणी (वय ३५, रा. पाटील इस्टेट, शिवाजीनगर, पुणे) यांनी दुचाकी क्रमांक KA-38-EA-8929 चा वापर करून रावेत परिसरात दोन चैन स्नॅचिंगचे गुन्हे केल्याची कबुली दिली.
आरोपींकडून रावेत पोलीस ठाण्यातील दोन चैन स्नॅचिंग प्रकरणांतील १ लाख ६५ हजार रुपयांचे सोन्याचे दागिने तसेच कर्नाटक राज्यातील बिदर ग्रामीण पोलीस ठाण्यातील मोटारसायकल चोरी प्रकरणातील एक लाख रुपये किंमतीची मोटारसायकल जप्त करण्यात आली. अशा प्रकारे एकूण २ लाख ६५ हजार रुपयांचा मुद्देमाल हस्तगत करण्यात आला आहे.
तपासात आरोपींनी हिंजवडी, तळेगाव दाभाडे, विश्रांतवाडी तसेच बिदर ग्रामीण पोलीस ठाण्याच्या हद्दीतील गुन्हे केल्याचेही उघड झाले आहे. आदित्य मनलोर याच्याविरुद्ध यापूर्वी मोबाईल स्नॅचिंग आणि चैन स्नॅचिंगचे सहा गुन्हे दाखल असल्याची माहिती पोलिसांनी दिली.
ही कारवाई सहायक पोलीस निरीक्षक संदीप देशमुख, पोलीस उपनिरीक्षक राहुल खिळे, संतोष कोळगे, आशिष बोटके, गोविंद चव्हाण, विनायक मराठे, प्रदीप गायकवाड, अजित बेंडभर, सौदागर लामतुरे, विनोद कदम व निखील कपले यांच्या पथकाने केली.
पोलीस आयुक्त विनय कुमार चौबे, सहपोलीस आयुक्त डॉ. शशिकांत महावरकर, अपर पोलीस आयुक्त सारंग आवाड, बसवराज तेली, पोलीस उपआयुक्त प्रदीप जाधव तसेच सहाय्यक पोलीस आयुक्त सुनील कुराडे यांच्या मार्गदर्शनाखाली ही उल्लेखनीय कामगिरी करण्यात आली.
