१५ शस्त्र परवाने रद्द,६८ अर्ज नामंजूर
पिंपरी-चिंचवड, दि.१३ जून २०२६ : पिंपरी-चिंचवड पोलिस आयुक्त विनय कुमार चौबे यांनी शस्त्र परवान्यांबाबत कठोर भूमिका घेत मोठी कारवाई केली आहे. विविध कारणांमुळे १५ शस्त्र परवाने रद्द करण्यात आले असून, नवीन शस्त्र परवान्यासाठी आलेले ६८ अर्ज नामंजूर करण्यात आले आहेत.
पोलिस आयुक्तालयाकडून शस्त्र परवान्यांच्या प्रकरणांचा आढावा घेण्यात आला. यामध्ये काही परवानाधारकांकडून शस्त्रांचा गैरवापर झाल्याचे तसेच त्यांच्याविरोधात विविध गुन्हे दाखल असल्याचे निदर्शनास आले. यानंतर संबंधित प्रकरणांची प्राथमिक चौकशी करून पाच परवानाधारकांचे शस्त्र परवाने रद्द करण्याचे आदेश देण्यात आले.
तसेच, शस्त्र परवाना मंजूर झाल्यानंतरही नियोजित मुदतीत शस्त्र खरेदी न करणाऱ्या दोन व्यक्तींचे परवाने रद्द करण्यात आले. याशिवाय वृद्धत्व, मृत्यू किंवा इतर कारणांमुळे आणखी आठ परवाने रद्द करण्यात आले. अशा प्रकारे एकूण १५ शस्त्र परवाने रद्द करण्यात आले आहेत.
दरम्यान, नवीन शस्त्र परवाना मिळविण्यासाठी प्राप्त झालेल्या अर्जांचीही कसून छाननी करण्यात आली. तपासादरम्यान अर्जदारांकडे शस्त्र परवान्याची आवश्यकता सिद्ध करणारे पुरेसे व ठोस कारण नसल्याचे आढळून आल्याने ६८ अर्ज फेटाळण्यात आले.
पोलिस आयुक्त विनय कुमार चौबे यांनी स्पष्ट केले की, शस्त्र परवान्यांबाबत भविष्यातही कठोर धोरण कायम ठेवले जाणार असून केवळ पात्र आणि आवश्यकतेची खात्री पटलेल्या व्यक्तींनाच परवाने दिले जातील. या कारवाईमुळे शस्त्र परवान्यांच्या गैरवापरावर अंकुश बसण्यास मदत होणार असल्याचे मानले जात आहे.
