गुन्हे शाखा युनिट-१ची उल्लेखनीय कामगिरी; पाच गुन्हे उघडकीस
पिंपरी-चिंचवड, दि. १३ : महिलांच्या गळ्यातील सोन्याचे दागिने हिसकावून पळणाऱ्या सराईत चैन स्नॅचरला गुन्हे शाखा युनिट-१च्या पथकाने फिल्मी स्टाईल पाठलाग करून अटक केली. या कारवाईत पाच चैन स्नॅचिंगचे गुन्हे उघडकीस आणत सुमारे १५ लाख रुपयांचे ७६ ग्रॅम वजनाचे सोन्याचे दागिने आणि गुन्ह्यात वापरलेल्या दोन स्पोर्ट्स बाईक जप्त करण्यात आल्या आहेत.
अटक करण्यात आलेल्या आरोपीचे नाव सुमित गोविंद इंगळे (वय ३१, रा. मामुर्डी, ता. हवेली, जि. पुणे; मूळ रा. श्रीपत पिंपरी, ता. बार्शी, जि. सोलापूर) असे आहे.
३ जून २०२६ रोजी विशालनगर, पिंपळे निलख येथे पायी चालणाऱ्या व्यक्तीच्या गळ्यातील दोन तोळ्यांची सोन्याची चैन अज्ञात चोरट्याने स्पोर्ट्स बाईकवरून येत हिसकावून नेली होती. याप्रकरणी सांगवी पोलीस ठाण्यात गुन्हा दाखल करण्यात आला होता.
घटनेचे गांभीर्य लक्षात घेऊन पोलीस आयुक्त विनयकुमार चौबे यांनी गुन्हे शाखेला तपासाचे आदेश दिले. त्यानुसार गुन्हे शाखा युनिट-१चे वरिष्ठ पोलीस निरीक्षक अरविंद पवार यांच्या मार्गदर्शनाखाली दोन विशेष पथके तयार करण्यात आली.
पथकाने आरोपीच्या हालचालींचा मागोवा घेण्यासाठी तब्बल १५० ते २०० सीसीटीव्ही फुटेजची तपासणी केली. तपासादरम्यान आरोपीने तळेगाव दाभाडे, देहूरोड आणि दापोडी परिसरातही अशाच प्रकारचे गुन्हे केल्याचे उघड झाले. आरोपी बेंगळुरू महामार्गाचा वापर करून वारंवार बाणेर परिसरात येत असल्याची माहिती मिळाल्यानंतर पोलिसांनी तेथे सापळा रचला.
७ जून रोजी रात्री आरोपी चैन स्नॅचिंगच्या उद्देशाने बाणेर परिसरात आला असता त्याला पोलिसांची चाहूल लागली आणि तो स्पोर्ट्स बाईकवरून पळून जाण्याचा प्रयत्न करू लागला. मात्र गुन्हे शाखेच्या पथकाने धाडसी पाठलाग करत त्याला ताब्यात घेतले.
तपासात आरोपीने सांगवी,दापोडी,तळेगाव दाभाडे,देहूरोड,भारती विद्यापीठ पोलीस ठाण्यांच्या हद्दीतील चैन स्नॅचिंगचे गुन्हे केल्याची कबुली दिली आहे.या सर्व गुन्ह्यांतील सोन्याचे दागिने पोलिसांनी जप्त केले आहेत.
सराईत गुन्हेगाराचा पूर्वइतिहास
सुमित इंगळे याच्यावर यापूर्वी हिंजवडी, सांगवी, शिरवळ आणि सिंहगड रोड पोलीस ठाण्यांत दरोडा, फसवणूक आणि जबरी चोरीचे अनेक गुन्हे दाखल आहेत. २०१६ ते २०२४ या कालावधीत त्याच्याविरुद्ध किमान आठ गंभीर गुन्ह्यांची नोंद असल्याचे पोलिसांनी सांगितले.
ही कारवाई पोलीस आयुक्त विनयकुमार चौबे, सहपोलीस आयुक्त शशिकांत महावरकर, अप्पर पोलीस आयुक्त सारंग आवाड, पोलीस उपायुक्त (गुन्हे) रोहिदास पवार आणि सहाय्यक पोलीस आयुक्त डॉ. विशाल हिरे यांच्या मार्गदर्शनाखाली गुन्हे शाखा युनिट-१च्या पथकाने केली.
“अवघ्या चार दिवसांत सीसीटीव्हींच्या आधारे माग काढत फिल्मी स्टाईल पाठलाग करून सराईत चैन स्नॅचरला जेरबंद करण्यात गुन्हे शाखा युनिट-१ला यश आले असून, नागरिकांमध्ये भीतीचे वातावरण निर्माण करणाऱ्या आरोपीच्या मुसक्या आवळण्यात आल्या आहेत.”
