एका महिन्यात ६२ हजारांहून अधिक वाहनचालकांवर कारवाई; ६.७६ कोटी रुपयांचा दंड वसूल
पिंपरी, दि. २ जून : पिंपरी-चिंचवड शहरातील वाढती वाहनसंख्या आणि वाहतूक नियमांचे वाढते उल्लंघन लक्षात घेऊन वाहतूक शाखेने मे २०२६ महिन्यात विशेष धडक मोहीम राबवत तब्बल ६२ हजार ७२७ वाहनचालकांवर कारवाई केली. या कारवाईतून ६ कोटी ७६ लाख ३० हजार ९०० रुपयांचा दंड आकारण्यात आला आहे.
पिंपरी-चिंचवड पोलीस आयुक्तालयाच्या कार्यक्षेत्रात चाकण, भोसरी, तळेगाव ही प्रमुख औद्योगिक केंद्रे, हिंजवडी, तळवडे व चिखली येथील आयटी पार्क तसेच देहू-आळंदी ही धार्मिक स्थळे असल्याने दररोज लाखो वाहनांची ये-जा होत असते. शहराचा झपाट्याने होत असलेला विस्तार आणि वाहनसंख्येतील वाढ यामुळे वाहतूक व्यवस्थेवर मोठा ताण निर्माण झाला आहे.
या पार्श्वभूमीवर पोलीस आयुक्त विनयकुमार चौबे यांच्या आदेशानुसार, पोलीस सहआयुक्त शशिकांत महावरकर व अपर पोलीस आयुक्त सारंग आवाड यांच्या मार्गदर्शनाखाली १ मे ते ३१ मे २०२६ या कालावधीत विशेष वाहतूक अंमलबजावणी मोहीम राबविण्यात आली.
नो पार्किंग आणि टोईंग कारवाईत आघाडी
वाहतूक शाखेने सर्वाधिक कारवाई वाहतुकीस अडथळा व नो पार्किंग प्रकरणांमध्ये केली असून १९ हजार ३४० वाहनचालकांवर दंडात्मक कारवाई करण्यात आली. तर ११ हजार ५८० वाहनांवर टोईंग कारवाई करण्यात आली.
सिग्नल जंपिंग, ट्रिपल सीट आणि जड वाहनांवरही वचक
मोहीमेदरम्यान ८ हजार ४८३ सिग्नल जंपिंग, ६ हजार ५३९ ट्रिपल सीट, ८ हजार १४२ जड-अवजड वाहनांवरील नियमभंग, तसेच १ हजार ९९३ मोबाईलवर बोलत वाहन चालविणाऱ्या चालकांवर कारवाई करण्यात आली.
याशिवाय ४०२ मद्यधुंद वाहनचालक, १ हजार ३२ मॉडिफाईड सायलेंसर, ३ हजार ९० काळी काच, ८७० विना परवाना वाहनचालक आणि २३९ राँग साईड वाहनचालकांवर देखील कारवाई करण्यात आली.
वाहतूक नियमांचे पालन करण्याचे आवाहन
या विशेष मोहिमेत एकूण ६२,७२७ वाहनचालकांवर कारवाई करून ६.७६ कोटी रुपयांचा दंड आकारण्यात आला. वाहतूक नियमांचे पालन करून स्वतःची आणि इतरांची सुरक्षितता जपावी तसेच दंडात्मक व न्यायालयीन कारवाई टाळावी, असे आवाहन पिंपरी-चिंचवड वाहतूक शाखेने नागरिकांना केले आहे.
