पिंपरी-चिंचवड : पिंपरी-चिंचवड गुन्हे शाखेच्या अंमली पदार्थ विरोधी पथकाने कारवाई करत २३ किलो ५३८ ग्रॅम वजनाचा गांजा जप्त केला असून तिघा आरोपींना अटक करण्यात आली आहे. आरोपींकडून गांजा, तीन मोबाईल फोन व रोख रक्कम असा एकूण १२ लाख १० हजार ५०० रुपयांचा मुद्देमाल जप्त करण्यात आला आहे.
पोलीस आयुक्त श्री. विनयकुमार चौबे यांनी शहरातील अंमली पदार्थांच्या अवैध विक्रीवर आळा घालण्यासाठी विशेष मोहिम राबविण्याचे आदेश दिले आहेत. त्यानुसार पोलीस उप आयुक्त गुन्हे श्री. प्रदीप जाधव व सहायक पोलीस आयुक्त गुन्हे-२ श्री. प्रविण मोरे यांच्या मार्गदर्शनाखाली अंमली पदार्थ विरोधी पथकाने ही कारवाई केली.
दि. २७ मे २०२६ रोजी दुपारी सुमारे ३.२५ वाजता चाकण दक्षिण पोलीस स्टेशन हद्दीतील शिक्रापूर-चाकण हायवे रोडलगत, मोहितेवाडी, शेलपिंपळगाव येथील हॉटेल वैष्णवीसमोर पोलिसांनी सापळा रचून संशयितांना ताब्यात घेतले.
या कारवाईत संदिप भगवान हांडे (वय २८), गणेश सुरेश तारु (वय ३०) व रिहान वसिम शेख (वय १९) यांना अटक करण्यात आली. आरोपींकडून २३ किलो ५३८ ग्रॅम गांजा, तीन मोबाईल फोन आणि रोख रक्कम जप्त करण्यात आली.
या प्रकरणी चाकण दक्षिण पोलीस स्टेशन येथे एनडीपीएस अॅक्ट कलम ८(क), २०(ब)(ii)(क) व २९ अन्वये गुन्हा दाखल करण्यात आला असून पुढील तपास पोलीस उपनिरीक्षक सुकाळे करत आहेत.
सदरची कारवाई वरिष्ठ पोलीस निरीक्षक महेश पाटील, सहाय्यक पोलीस निरीक्षक विक्रम गायकवाड, पोलीस हवालदार निखिल शेटे, विजय दौंडकर तसेच अंमली पदार्थ विरोधी पथकातील कर्मचाऱ्यांनी केली.
