लोकसेवक युवराज दाखले यांचा आरोप; अतिक्रमण तात्काळ हटवण्याची मागणी
पिंपरी-चिंचवड, दि. २५ मे २०२६ : प्रभाग क्र. २७ मधील राहटणी-काळेवाडी, साई सागर कॉलनी, वृंदावन कॉलनी, तापकीर नगर परिसरातील नैसर्गिक नाल्यावर बांधकाम व्यावसायिक व एका नामांकित इंग्रजी शाळा व्यवस्थापनाने संगनमत करून बेकायदेशीर अतिक्रमण केल्याचा गंभीर आरोप लोकसेवक युवराज दाखले यांनी केला आहे. पावसाळा अवघ्या २० दिवसांवर असताना हे अतिक्रमण तातडीने हटवले नाही, तर संपूर्ण परिसर महापुराच्या धोक्यात जाऊन मोठी जीवितहानी होऊ शकते, असा इशारा त्यांनी दिला.
लोकसेवक युवराज दाखले म्हणाले, “साई सागर कॉलनी व वृंदावन कॉलनी परिसरातील सुमारे २० फूट रुंदीचा नैसर्गिक नाला बिल्डरने मुरूम व दगड टाकून बुजवला असून त्यावर बेकायदेशीर बांधकाम करण्यात आले आहे. तसेच संबंधित इंग्रजी शाळेने नाल्याची दिशा बदलून संरक्षक भिंत व पत्रा शेड उभारले आहे. त्यामुळे नाल्याची रुंदी आता केवळ ४ ते ५ फूट इतकी उरली आहे. मागील वर्षी याच कारणामुळे शेकडो घरांमध्ये पाणी शिरून नागरिकांचे लाखो रुपयांचे नुकसान झाले होते. हे अतिक्रमण म्हणजे नागरिकांच्या जीवाशी थेट खेळ आहे.”
“महापालिका अधिनियम १९४९ मधील कलम २२९ व २३१ तसेच पर्यावरण संरक्षण अधिनियम १९८६ चा हा स्पष्ट भंग आहे. मा. मुंबई उच्च न्यायालयाने नैसर्गिक नाल्यांवरील अतिक्रमणे हटवण्याचे आदेश दिलेले असतानाही पिंपरी चिंचवड महानगरपालिका अतिक्रमण विभागाचे अधिकारी निष्क्रिय आहेत.यामागे मोठ्या आर्थिक व्यवहाराचा संशय निर्माण होत आहे,” असा आरोपही दाखले यांनी केला.
शिवशाही शासनाच्या प्रमुख मागण्या :
💮सात दिवसांच्या आत भूमापन करून नाल्यावरील सर्व अतिक्रमणे बुलडोझरद्वारे हटवावीत.
💮संबंधित बिल्डर, शाळा व्यवस्थापन व दोषी PCMC अधिकाऱ्यांवर फौजदारी गुन्हे दाखल करावेत.
💮नाला मूळ स्थितीत आणून दोन्ही बाजूंना संरक्षक भिंत व CCTV कॅमेरे बसवावेत.
💮पावसाळ्यापूर्वी कारवाई न झाल्यास आयुक्तांवर सदोष मनुष्यवधाचा गुन्हा दाखल करण्यात यावा.
“जर आठ दिवसांत नाल्यावरील अतिक्रमण हटवले नाही, तर शिवशाही शासन स्टाईलने आम्ही स्वतः हातोडा घेऊन अतिक्रमण हटवू. नागरिकांच्या जीवाशी खेळणाऱ्या बिल्डर-शाळा माफियांना सोडणार नाही,”
……..युवराज दाखले.
यासंदर्भात महापालिका आयुक्त, जिल्हाधिकारी व पोलीस आयुक्त यांना निवेदन देण्यात आल्याची माहिती देण्यात आली.
