पिंपरी-चिंचवड : एमआयडीसी भोसरी परिसरातील स्पाईन रोडवर झालेल्या भीषण अपघातात एका स्कुटीस्वाराचा मृत्यू झाल्याची घटना समोर आली आहे. या प्रकरणी एमआयडीसी भोसरी पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, हा अपघात दि. २० मे २०२६ रोजी रात्री सुमारे ९ वाजण्याच्या सुमारास कलावंतीन महालमाता सर्व्हिसिंग सेंटरसमोर, स्पाईन रोड, एमआयडीसी भोसरी येथे घडला. या प्रकरणी दि. २१ मे २०२६ रोजी पहाटे २:४१ वाजता गुन्हा नोंदविण्यात आला.
या घटनेत मृत्यू झालेल्या व्यक्तीचे नाव उत्तम रणपिसे असे असून, फिर्याद त्यांचे नातेवाईक प्रशांत उत्तम रणपिसे (वय ३५, रा. शिवमुद्रा हाऊसिंग सोसायटी, घरकुल-चिखली, पुणे) यांनी दिली आहे.
पोलिसांनी दिलेल्या माहितीनुसार, आरोपी ट्रक चालक किशोर हरीचंद्र जाधव (वय ५०, रा. नाणेकरवाडी, चाकण, पुणे) हा टाटा कंपनीचा ट्रक (MH 14 JL 5733) बेदरकारपणे चालवत होता. त्याने रहदारीच्या नियमांकडे दुर्लक्ष करून रणपिसे यांच्या स्कुटीला उजव्या बाजूने जोरदार धडक दिली. धडकेनंतर रणपिसे हे स्कुटीसह रस्त्यावर पडले. त्यानंतर ट्रकचे मागील चाक त्यांच्या डोक्यावरून गेल्याने त्यांचा जागीच मृत्यू झाला.
या प्रकरणी एमआयडीसी भोसरी पोलिस ठाण्यात बीएनएस कलम १०६(१), २८१ तसेच मोटार वाहन कायदा कलम १८४, ११९/१७७ अन्वये गुन्हा दाखल करण्यात आला असून पुढील तपास पोउपनि मणेर करीत आहेत.
