चौकशी करून कठोर कारवाईची मागणी
पिंपरी-चिंचवड : कथित बनावट कुराश क्रीडा प्रमाणपत्रांच्या आधारे पोलीस भरती प्रक्रियेत खेळाडू कोट्यातून प्रवेश मिळवण्याचा प्रयत्न होत असल्याचा गंभीर आरोप करत संबंधित उमेदवारांवर सखोल चौकशी करून कठोर कायदेशीर कारवाई करावी, अशी मागणी मानवी हक्क संरक्षण आणि जागृती, पिंपरी-चिंचवड शहर यांच्या वतीने करण्यात आली आहे.
यासंदर्भात महाराष्ट्र राज्य क्रीडा व युवक सेवा संचालनालय, बालेवाडी येथे क्रीडा आयुक्त दीपक सिंगला यांना निवेदन देण्यात आले. या निवेदनात संबंधित उमेदवारांची नियुक्ती चौकशी पूर्ण होईपर्यंत स्थगित ठेवण्याची मागणीही करण्यात आली आहे.
संस्थेचे शहराध्यक्ष आण्णा जोगदंड यांनी दिलेल्या माहितीनुसार, सध्या सुरू असलेल्या पोलीस शिपाई भरती प्रक्रियेत काही उमेदवारांनी कुराश खेळाची कथित बनावट प्रमाणपत्रे सादर करून शासन सेवेत प्रवेश मिळवण्याचा प्रयत्न केला आहे. काही उमेदवार सेवेतही असल्याचा दावा त्यांनी केला. तसेच संबंधित क्रीडा संघटनांनी आर्थिक व्यवहार करून खोटे रेकॉर्ड तयार केल्याचाही गंभीर आरोप त्यांनी केला आहे.
संस्थेचे अध्यक्ष विकास कुचेकर म्हणाले की, उमेदवारांनी सादर केलेल्या प्रमाणपत्रांची पडताळणी प्रक्रियाही संशयाच्या भोवऱ्यात सापडली आहे. या गैरप्रकारामुळे प्रामाणिक आणि पात्र खेळाडूंवर अन्याय होत असून शासनाच्या खेळाडू आरक्षण व्यवस्थेची विश्वासार्हता धोक्यात येत आहे. माहिती अधिकार कायद्यांतर्गत माहिती मागवण्यात आली असून, बोगस प्रमाणपत्र प्रकरणात कारवाई न झाल्यास न्यायालयात दाद मागणार असल्याचा इशाराही त्यांनी दिला.
डॉ. यामिनी अडबे यांनी सांगितले की, भारतीय न्याय संहिता २०२३ अंतर्गत फसवणूक, बनावट कागदपत्र तयार करणे आणि त्यांचा वापर करणे यासंदर्भातील कलमान्वये गुन्हे दाखल करण्याची मागणी निवेदनात करण्यात आली आहे. तसेच संबंधित क्रीडा संघटनांची मान्यता रद्द करून संपूर्ण प्रकरणाची स्वतंत्र आणि निष्पक्ष चौकशी करावी, अशी मागणीही करण्यात आली आहे.
शौर्य संघटनेचे अध्यक्ष हनुमंत धायगुडे यांनी दावा केला की, महाराष्ट्रातील विविध भागांतून बोगस क्रीडा प्रमाणपत्रांच्या आधारे नोकरी मिळवलेल्या उमेदवारांची माहिती त्यांच्या संघटनेकडे आली असून, दोषींवर कारवाई झाल्याशिवाय शांत बसणार नसल्याचे त्यांनी स्पष्ट केले.यापूर्वीही या प्रकरणी पिंपरी-चिंचवड पोलीस आयुक्तांकडे निवेदन देण्यात आल्याची माहिती संस्थेच्या वतीने देण्यात आली.
हे निवेदन संस्था अध्यक्ष विकास कुचेकर, डॉ. यामिनी अडबे, शहराध्यक्ष आण्णा जोगदंड, उपाध्यक्ष काळुराम लांडगे, सचिव गजानन धाराशिवकर, कार्याध्यक्ष मुरलीधर दळवी आणि प्रमोद पाटील यांच्या स्वाक्षरीने सादर करण्यात आले.
