पिंपरी चिंचवड गुरुवार दिं.१४ मे….पिंपरी चिंचवड महानगरपालिका हद्दीतील पुनावळे परिसरातील माध्यमिक शाळेसाठी आरक्षित असलेला सुमारे ९१ गुंठे भूखंड खाजगी संस्थेला भाडेतत्त्वावर देण्याच्या प्रस्तावावरून नागरिकांमध्ये तीव्र नाराजी व्यक्त होत आहे. सर्वसामान्य नागरिकांच्या मुलांच्या शिक्षणासाठी राखीव असलेली सार्वजनिक जागा खासगी संस्थेकडे देण्याचा निर्णय शिक्षणाच्या व्यापारीकरणाला चालना देणारा असल्याची भावना नागरिकांकडून व्यक्त करण्यात येत आहे.
पुनावळे परिसरात मोठ्या प्रमाणावर नागरी वसाहती विकसित होत असून हजारो कुटुंबे येथे स्थायिक झाली आहेत. वाढत्या लोकसंख्येच्या पार्श्वभूमीवर महापालिकेने स्वतःची दर्जेदार, परवडणारी आणि सर्वांसाठी खुली माध्यमिक शाळा सुरू करणे आवश्यक असल्याचे स्थानिक नागरिकांचे म्हणणे आहे.
नागरिकांच्या मते, जर हा भूखंड खासगी संस्थेकडे गेला तर भविष्यात शिक्षणाचा खर्च वाढून सर्वसामान्य कुटुंबांसाठी शिक्षण आवाक्याबाहेर जाण्याची शक्यता आहे. सार्वजनिक जमिनीचा वापर सार्वजनिक हितासाठीच व्हावा, अशी मागणीही स्थानिकांकडून करण्यात येत आहे.
दरम्यान, सामाजिक कार्यकर्ते चेतन गौतम बेंद्रे यांनी महापालिकेने नागरिकांच्या भावना लक्षात घेऊन हा प्रस्ताव तात्काळ मागे घ्यावा आणि पुनावळेकरांसाठी महापालिकेची स्वतंत्र शाळा उभारावी, अशी मागणी केली आहे.
