आरोपींवर मकोका लावून खटला फास्ट ट्रॅक न्यायालयात चालविण्याची मागणी; मुख्यमंत्र्यांना निवेदन
छ.संभाजीनगर/वैजापूर प्रतिनिधी: वैजापूर येथील बौद्ध युवक रोहित अनिल पठारे यांच्या निर्घृण हत्या प्रकरणाची विशेष तपास पथकामार्फत (SIT) सखोल व निष्पक्ष चौकशी करण्यात यावी, तसेच आरोपींवर महाराष्ट्र संघटित गुन्हेगारी नियंत्रण कायद्यानुसार (मकोका) कारवाई करून खटला फास्ट ट्रॅक न्यायालयात चालवावा, अशी मागणी आंबेडकरी चळवळीतील पदाधिकारी व कार्यकर्त्यांनी केली आहे. यासंदर्भात महाराष्ट्राच्या मुख्यमंत्र्यांना उपविभागीय पोलीस अधिकारी, वैजापूर यांच्यामार्फत निवेदन सादर करण्यात आले.
रोहित पठारे यांची जातीयवादी मानसिकतेतून निर्घृण हत्या करण्यात आल्याचा आरोप निवेदनातून करण्यात आला आहे. या घटनेत आरोपींनी संघटितपणे कट रचल्याचा संशय व्यक्त करत, हत्येच्या संपूर्ण कटाचा पर्दाफाश करून मुख्य सूत्रधारांचा शोध घेण्यासाठी वरिष्ठ पोलीस अधिकाऱ्यांच्या देखरेखीखाली स्वतंत्र SIT स्थापन करण्याची मागणी करण्यात आली आहे.
दरम्यान, वैजापूर पोलिसांकडून सुरू असलेल्या तपासाबाबत रोहित पठारे यांचे कुटुंबीय तसेच वैजापूर तालुक्यातील अनुसूचित जातीच्या समाजबांधवांनी अविश्वास व्यक्त केल्याचे निवेदनात नमूद करण्यात आले आहे. त्यामुळे सद्यस्थितीतील तपास प्रक्रियेवर वरिष्ठ स्तरावर देखरेख ठेवून दोषींवर कठोर कायदेशीर कारवाई करावी, अशी भूमिका निवेदनकर्त्यांनी मांडली आहे.
तसेच या प्रकरणातील आरोपींविरुद्ध मकोका कायद्यांतर्गत कारवाई करून खटला जलदगती न्यायालयात चालवावा, जेणेकरून पीडित कुटुंबीयांना लवकर न्याय मिळेल, अशी मागणीही करण्यात आली आहे.
या निवेदनावर आंबेडकरी चळवळीचे ज्येष्ठ नेते दिनकर ओंकार, रमेश गायकवाड, बंडू कांबळे, सुरेश पाटील, विजय वाहुळ, विशाल इंगळे, मोहन म्हस्के, नाना म्हस्के, किरण मांदळे, नरेश पाखरे, नितीन आढमाने, मुकेश खोतकर, रवी मगर, धर्मेंद्र बनकर, सोनू नरवडे, संदीप जमधडे, अभिजित शरणागत, सागर बागुल, अभिमन्यू आंभोरे, अजय राठोड, कपिल बनकर, मिलिंद जमधडे, आनंद गायकवाड, प्रशांत त्रिभुवन, विजय मोकळे, आबासाहेब कसबे, राजवीर त्रिभुवन आणि अंकुश पठारे आदींच्या स्वाक्षऱ्या आहेत.
रोहित पठारे हत्या प्रकरणातील सत्य समोर यावे, हत्येच्या कटातील सर्व संबंधितांचा शोध लागावा आणि पीडित कुटुंबीयांना न्याय मिळावा, यासाठी या प्रकरणाची निष्पक्ष चौकशी करून दोषींवर कठोर कारवाई करावी, अशी ठाम मागणी निवेदनाद्वारे करण्यात आली आहे.
