आम आदमी पार्टी रिक्षा संघटनेचा जिल्हाधिकाऱ्यांना इशारा; कंपन्यांवर गुन्हे दाखल करून अ‍ॅप्स बंद करण्याची मागणी
पिंपरी-चिंचवड, : पुणे आणि पिंपरी-चिंचवड शहरात विनापरवाना सुरू असलेल्या रॅपिडो, उबेर आणि ओला या कंपन्यांच्या बाईक टॅक्सी सेवा तातडीने बंद कराव्यात. संबंधित कंपन्यांवर फौजदारी गुन्हे दाखल करून त्यांची वाहने जप्त करावीत आणि बाईक टॅक्सी अ‍ॅप्स बंद करण्यासाठी कठोर कारवाई करावी, अशी मागणी आम आदमी पार्टी रिक्षा संघटनेच्या वतीने पुणे जिल्हाधिकाऱ्यांकडे निवेदनाद्वारे करण्यात आली आहे.
प्रादेशिक परिवहन कार्यालय, पुणे (आरटीओ) यांनी २६ ऑक्टोबर २०२६ रोजी प्रसिद्ध केलेल्या वृत्तनिवेदनात रॅपिडो कंपनीकडे वैध बाईक टॅक्सी अ‍ॅग्रीगेटर परवाना नसल्याचे स्पष्ट केल्याचा दावा संघटनेने केला आहे. असे असतानाही पुणे आणि पिंपरी-चिंचवडमध्ये बाईक टॅक्सी सेवा सुरू असल्याने कायद्याच्या अंमलबजावणीवर प्रश्नचिन्ह उपस्थित होत आहे.
रिक्षा चालकांच्या रोजगारावर गदा
विनापरवाना बाईक टॅक्सी सेवांमुळे नियमानुसार परवाने घेऊन व्यवसाय करणाऱ्या रिक्षा व टॅक्सी चालकांच्या उपजीविकेवर परिणाम होत आहे. तसेच आवश्यक परवाने आणि व्यावसायिक विमा नसलेल्या वाहनांमधून प्रवास करणाऱ्या नागरिकांच्या सुरक्षिततेचाही गंभीर प्रश्न निर्माण झाला आहे, असे संघटनेने निवेदनात म्हटले आहे.
यावेळी आम आदमी पार्टी पिंपरी-चिंचवड रिक्षा संघटनेचे अध्यक्ष अंगद मुगळे यांनी बेकायदा बाईक टॅक्सी सेवा चालवणाऱ्या कंपन्यांविरोधात सायबर गुन्हे विभाग आणि पोलिसांमार्फत कठोर कारवाई करण्याची मागणी केली. केवळ औपचारिक कारवाई न करता संबंधित कंपन्यांवर फौजदारी गुन्हे दाखल करावेत, वाहने जप्त करावीत आणि त्यांच्या अ‍ॅप्सवर बंदी आणण्यासाठी तातडीने पावले उचलावीत, अशी भूमिका त्यांनी मांडली.
आठ दिवसांत कारवाई करा, अन्यथा आंदोलन
पुढील आठ दिवसांत ठोस कारवाई न झाल्यास पुणे व पिंपरी-चिंचवड प्रादेशिक परिवहन कार्यालय तसेच पुणे जिल्हाधिकारी कार्यालयासमोर बेमुदत धरणे आंदोलन छेडण्यात येईल, असा इशारा आम आदमी पार्टीचे पिंपरी-चिंचवड शहराध्यक्ष वैजनाथ शिरसाट यांनी दिला आहे.
“या मागणीला आम आदमी पार्टी रिक्षा संघटनेने पूर्ण पाठिंबा दर्शविला असून, बेकायदा बाईक टॅक्सी सेवांवर तातडीने कारवाई करून रिक्षा व टॅक्सी चालकांना न्याय द्यावा, अशी मागणी करण्यात आली आहे”
— अंगद रमेश मुगळे,अध्यक्ष, आम आदमी पार्टी रिक्षा संघटना, पिंपरी-चिंचवड
