उद्यान विभागाचे दुर्लक्ष; जबाबदारी निश्चित कोण करणार? अण्णा जोगदंड यांचा संतप्त सवाल
पिंपरी-चिंचवड (प्रतिनिधी) : पिंपळे गुरव येथील राजमाता जिजाऊ उद्यानातील ओपन जिमचे साहित्य गेल्या सहा महिन्यांपासून नादुरुस्त असून, उद्यानात भटक्या कुत्र्यांचाही मुक्त वावर असल्याने नागरिकांच्या सुरक्षिततेचा प्रश्न ऐरणीवर आला आहे. उद्यान विभागाच्या कर्मचाऱ्यांकडे वारंवार तक्रारी करूनही दुरुस्ती होत नसल्याने प्रशासनाच्या कार्यक्षमतेवर प्रश्नचिन्ह निर्माण झाले आहे. संबंधित अधिकारी एकमेकांकडे जबाबदारी ढकलत असल्याचा आरोप मानवी हक्क संरक्षण जागृतीचे शहराध्यक्ष अण्णा जोगदंड यांनी केला आहे.
जोगदंड म्हणाले की, मी स्वतः दररोज पहाटे या उद्यानात जातो. त्यामुळे उद्यानातील समस्यांची मला प्रत्यक्ष माहिती आहे. ओपन जिममधील साहित्य गेल्या सहा महिन्यांपासून नादुरुस्त आहे. नागरिकांनी अनेकदा कर्मचाऱ्यांच्या निदर्शनास ही बाब आणून दिली; मात्र अद्याप दुरुस्ती करण्यात आलेली नाही. यावरून उद्यान विभागाचे या समस्येकडे किती अक्षम्य दुर्लक्ष होत आहे, हे स्पष्ट होते.
अधिकारी एकमेकांकडे बोट दाखवतात; नागरिकांनी दाद कोणाकडे मागायची?
ओपन जिमच्या नादुरुस्त साहित्याबाबत संबंधित अधिकाऱ्यांशी संपर्क साधला असता, प्रत्येकाकडून वेगवेगळी उत्तरे मिळाल्याचे जोगदंड यांनी सांगितले. उद्यान सहाय्यक अधीक्षक राजेश वसावे यांनी संबंधित कर्मचाऱ्यांशी बोलून काम करून घेण्याचे आश्वासन दिले. त्यानंतर उद्यान विभागाचे सुपरवायझर अजय जाधव यांच्याशी संपर्क साधला असता, ओपन जिमचे काम ड प्रभागाच्या क्रीडा विभागाकडे असल्याचे सांगून त्यांनी दुसऱ्या विभागाशी संपर्क साधण्यास सांगितले.
त्यानंतर ड प्रभागाचे उद्यान पर्यवेक्षक अशोक शिंदे यांच्याशी संपर्क साधला असता, त्यांनीही काम करून देण्याचे आश्वासन दिले. मात्र, प्रत्यक्षात दुरुस्ती कधी होणार, याबाबत स्पष्टता नसल्याने नागरिकांमध्ये नाराजी आहे.
“प्रत्येक अधिकारी एकमेकांकडे बोट दाखवत आहे; मग या कामाची खरी जबाबदारी कोणाची? सर्वसामान्य नागरिकांनी तक्रार नेमकी कोणाकडे करायची? प्रशासनाने नागरिकांना अशा प्रकारे हेलपाटे मारायला लावणे योग्य आहे का?” असा संतप्त सवाल अण्णा जोगदंड यांनी उपस्थित केला.
उद्यानात भटक्या कुत्र्यांचा वावर; नागरिकांच्या सुरक्षिततेचा प्रश्न
यावेळी पंडित वनस्कर यांनीही उद्यानातील समस्यांकडे लक्ष वेधले. ते म्हणाले की, मीदेखील दररोज सकाळी उद्यानात जातो. उद्यानात भटकी कुत्री फिरताना दिसतात. काही वेळा ही कुत्री नागरिकांच्या अंगावर धावून जात असल्याने नागरिकांच्या सुरक्षिततेचा प्रश्न निर्माण झाला आहे.
उद्यानाभोवती संरक्षक उंच भिंत असतानाही मुख्य प्रवेशद्वारातून भटकी कुत्री आत प्रवेश करतातच कशी, असा सवाल त्यांनी उपस्थित केला. उद्यान विभागाच्या वरिष्ठ अधिकाऱ्यांनी या प्रकरणात गांभीर्याने लक्ष घालून ओपन जिमच्या साहित्याची तातडीने दुरुस्ती करावी, तसेच भटक्या कुत्र्यांचा प्रवेश रोखण्यासाठी योग्य उपाययोजना कराव्यात, अशी मागणीही त्यांनी केली.
वरिष्ठ अधिकाऱ्यांनी तातडीने लक्ष घालण्याची मागणी
राजमाता जिजाऊ उद्यान हे परिसरातील नागरिकांसाठी व्यायाम आणि विरंगुळ्याचे महत्त्वाचे ठिकाण आहे. त्यामुळे उद्यानातील व्यायामाचे साहित्य सुस्थितीत ठेवणे, स्वच्छता राखणे आणि नागरिकांच्या सुरक्षिततेची काळजी घेणे ही संबंधित प्रशासनाची जबाबदारी आहे. सहा महिन्यांपासून ओपन जिमची दुरुस्ती रखडणे आणि भटक्या कुत्र्यांचा वावर सुरू राहणे, या बाबींकडे वरिष्ठ अधिकाऱ्यांनी तातडीने लक्ष द्यावे, अशी मागणी मानवी हक्क संरक्षण जागृतीच्या पदाधिकाऱ्यांनी केली.
यावेळी शहराध्यक्ष अण्णा जोगदंड, कार्याध्यक्ष मुरलीधर दळवी, सचिव गजानन धाराशिवकर, महाराष्ट्र महिला अध्यक्षा संगीता जोगदंड, शहराध्यक्षा संजना करंजावणे, काळुराम लांडगे, पंडित वनस्कर आणि आदेश जोमवाळे उपस्थित होते.
