पिंपरी-चिंचवड पोलिसांकडून गणेशोत्सव-२०२६ची यशस्वी सांगता

६ हजारांहून अधिक पोलीस अधिकारी-अंमलदारांचा बंदोबस्त; ५१०७ गुन्हेगारांवर प्रतिबंधक कारवाई

पिंपरी : पिंपरी-चिंचवड पोलीस आयुक्तालयाच्या हद्दीत गणेशोत्सव-२०२६ शांतता, सुरक्षितता आणि मंगलमय वातावरणात पार पाडण्यासाठी पोलीस प्रशासनाने केलेल्या व्यापक नियोजनाला यश आले. गणेशोत्सवाच्या पार्श्वभूमीवर पोलीस प्रशासनाने विविध स्तरांवर तब्बल १७५ बैठका घेत मंडळांच्या पदाधिकाऱ्यांना आवश्यक सूचना दिल्या. तसेच गुन्हेगारांवर वचक ठेवण्यासाठी मोठ्या प्रमाणात प्रतिबंधक कारवाया करण्यात आल्या.

गणेशोत्सव निर्विघ्नपणे पार पाडण्यासाठी आयुक्तालयाच्या हद्दीत ६ हजारांहून अधिक पोलीस अधिकारी व अंमलदार बंदोबस्तासाठी तैनात करण्यात आले होते. राज्य राखीव पोलीस दल, गृहरक्षक दल तसेच बाहेरील पोलीस घटकांचीही मदत घेण्यात आली.

यंदाच्या गणेशोत्सवासाठी पोलीस आयुक्त विनय कुमार चौबे यांच्या मार्गदर्शनाखाली आयुक्तालय स्तरावर गणेश मंडळांच्या पदाधिकाऱ्यांच्या बैठका घेण्यात आल्या. तसेच परिमंडळीय पोलीस उपआयुक्त आणि पोलीस ठाणे स्तरावर शांतता समिती सदस्य व मंडळांच्या पदाधिकाऱ्यांच्या बैठका घेऊन गणेशमूर्तीची सुरक्षित वाहतूक, स्वयंसेवकांची २४ तास उपस्थिती, सीसीटीव्ही व्यवस्था, लेझर लाईटचा वापर टाळणे तसेच ध्वनिप्रदूषणासंदर्भातील नियमांचे पालन करण्याच्या सूचना देण्यात आल्या.

५१०७ गुन्हेगारांवर प्रतिबंधक कारवाई

गणेशोत्सव काळात कायदा व सुव्यवस्था अबाधित राहावी यासाठी गुन्हेगारांवर प्रतिबंधात्मक कारवाई करण्यात आली. २०२५ मध्ये ३८५६ गुन्हेगारांवर कारवाई करण्यात आली होती. यंदा २३ सप्टेंबर २०२६ पर्यंत ५१०७ गुन्हेगारांवर प्रतिबंधक कारवाई करण्यात आली आहे. तसेच ३० सराईत गुन्हेगारांवर तडीपारीची कारवाई करण्यात आली आहे.

‘एक मंडळ–एक अंमलदार’ योजना यशस्वी

गणेशोत्सव काळात सार्वजनिक गणेश मंडळांशी थेट संपर्क राहावा आणि कोणतीही अनुचित घटना घडल्यास तातडीने प्रतिसाद देता यावा, यासाठी ‘एक मंडळ–एक अंमलदार’ योजना १०० टक्के राबविण्यात आली.

आयुक्तालयाच्या हद्दीत यंदा २ हजार ४११ सार्वजनिक गणेशोत्सव मंडळे, तर २ लाख ७० हजार १२४ घरगुती गणपतींची स्थापना करण्यात आली.

ध्वनिप्रदूषण करणाऱ्या डीजे चालकांवर कारवाई

पोलीस प्रशासनाच्या सूचनांकडे दुर्लक्ष करून निर्धारित ध्वनीमर्यादेचे उल्लंघन करणाऱ्या डीजे चालक व मालकांवर कारवाई करण्यात आली. आतापर्यंत एकूण ६३ गुन्हे दाखल करून ५८ मुद्देमाल जप्त करण्यात आला आहे.

यामध्ये परिमंडळ-२ मध्ये ३३, परिमंडळ-१ मध्ये १६, परिमंडळ-३ मध्ये ५ आणि परिमंडळ-४ मध्ये ९ गुन्हे दाखल करण्यात आले आहेत.

अनंत चतुर्दशीसाठी कडेकोट बंदोबस्त

२५ सप्टेंबर २०२६ रोजी अनंत चतुर्दशीच्या दिवशी १ हजार ३९८ सार्वजनिक गणेश मंडळांच्या विसर्जन मिरवणुका निघणार असून ६८ हजार ९९६ घरगुती गणपतींचे विसर्जन होणार आहे.

या पार्श्वभूमीवर विसर्जनासाठी १ अपर पोलीस आयुक्त, ८ पोलीस उपआयुक्त, १६ सहाय्यक पोलीस आयुक्त, ७४ पोलीस निरीक्षक, २९० सहायक पोलीस निरीक्षक/पोलीस उपनिरीक्षक, २७८० पोलीस अंमलदार, ६ आरसीपी, ६०२ होमगार्ड, एमआरपीएफच्या २ प्लाटून आणि १६६ वॉर्डन असा मोठा बंदोबस्त तैनात करण्यात आला आहे.

पिंपरी-चिंचवड शहरातील गणेशोत्सवाची ओळख जागतिक पातळीवर निर्माण करण्याच्या उद्देशाने ‘Bappa.org’ वर गणेश मंडळांनी नोंदणी करण्याचे आवाहनही पोलीस आयुक्त विनय कुमार चौबे यांनी केले आहे.

पोलीस प्रशासनाच्या नियोजनबद्ध बंदोबस्तामुळे गणेशोत्सव काळात कायदा व सुव्यवस्था अबाधित ठेवत उत्सवाची शांततेत आणि मंगलमय वातावरणात सांगता करण्यात येत आहे.