एमआयडीसी भोसरी पोलिसांच्या तपासाला यश; ३० दिवसांत आरोपपत्र दाखल, जलदगती न्यायालयीन प्रक्रियेत निकाल
भोसरी एमआयडीसी….: अल्पवयीन पीडित मुलीवरील लैंगिक अत्याचाराच्या गंभीर प्रकरणात एमआयडीसी भोसरी पोलिसांनी केलेल्या प्रभावी तपासानंतर आरोपीला न्यायालयाने २० वर्षांच्या कारावासाची शिक्षा सुनावली आहे. आरोपी रामू कुंजल निसाद (वय ४०, रा. शंभू कॉलनी, विनायकनगर, मोशी) याला दोषी ठरवत पिंपरी-चिंचवड जिल्हा सत्र न्यायालयाचे विशेष व अतिरिक्त सत्र न्यायाधीश एस. एन. यादव यांनी हा निकाल २२ सप्टेंबर २०२६ रोजी दिला.
या प्रकरणी एमआयडीसी भोसरी पोलीस ठाण्यात गुन्हा रजि. नं. १८१/२०२६ अन्वये भारतीय न्याय संहिता (BNS) कलम ६४(१), ६५(२), ७४, ३५१ तसेच POCSO कायद्यातील कलम ४, ६ व ८ अंतर्गत गुन्हा दाखल करण्यात आला होता.
३० दिवसांत आरोपपत्र दाखल
सदर गुन्हा ३ एप्रिल २०२६ रोजी दाखल झाला होता. या प्रकरणाचा तपास पोलीस उपनिरीक्षक चैत्राली भिसे यांनी केला. तपास पूर्ण करून अवघ्या ३० दिवसांच्या आत न्यायालयात आरोपपत्र दाखल करण्यात आले. प्रकरणाची सुनावणी जलदगतीने घेण्यात यावी, अशी अभियोग पक्षाकडून न्यायालयाकडे विनंती करण्यात आली होती. न्यायालयाने ही विनंती मान्य करून प्रकरणाची सुनावणी जलदगतीने पूर्ण केली.
विविध कलमांखाली शिक्षा
न्यायालयाने आरोपीला BNS कलम ६४(१) अंतर्गत २० वर्षे कारावास व १० हजार रुपये दंड, कलम ६५(२) अंतर्गत २० वर्षे कारावास व १० हजार रुपये दंड, कलम ७४ अंतर्गत ३ वर्षे कारावास व १० हजार रुपये दंड, तर कलम ३५१ अंतर्गत ३ वर्षे कारावास व १० हजार रुपये दंड अशी शिक्षा सुनावली.
तसेच POCSO कायद्याच्या कलम ४ व ६ अंतर्गत प्रत्येकी २० वर्षे कारावास व १० हजार रुपये दंड, तर कलम ८ अंतर्गत ५ वर्षे कारावास व १० हजार रुपये दंड सुनावण्यात आला आहे. दंडाची रक्कम न भरल्यास संबंधित शिक्षेत अतिरिक्त कारावासाची तरतूद करण्यात आली आहे. वरील सर्व शिक्षा एकत्रित भोगावयाच्या आहेत.
विशेष सरकारी अभियोक्त्यांकडून प्रभावी बाजू
या प्रकरणात विशेष सरकारी अभियोक्ता स्मिता मकंद चौगले यांनी सरकार पक्षातर्फे साक्षीदारांच्या साक्षी नोंदवून न्यायालयात प्रभावीपणे बाजू मांडली. तसेच कोर्ट पैरवी अधिकारी मपोहवा एस. आर. सरसे यांनी न्यायालयीन कामकाजात प्रभावी समन्वय साधला.
ही कारवाई पोलीस आयुक्त विनयकुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त (गुन्हे) सारंग आवाड, अपर पोलीस आयुक्त (प्रादेशिक विभाग) डॉ. बसवराज तेली, पोलीस उपआयुक्त, परिमंडळ-३ मारुती जगताप, सहायक पोलीस आयुक्त सुधाकर यादव, वरिष्ठ पोलीस निरीक्षक, एमआयडीसी भोसरी पोलीस ठाणे गणेश जामदार तसेच पोलीस निरीक्षक (गुन्हे) भोजराज मिसाळ यांच्या मार्गदर्शनाखाली करण्यात आली.
अल्पवयीन मुलींच्या सुरक्षिततेला सर्वोच्च प्राधान्य
पिंपरी-चिंचवड पोलीस आयुक्तालयाकडून अल्पवयीन मुलींच्या सुरक्षिततेला सर्वोच्च प्राधान्य देण्यात येत असून, अशा गंभीर गुन्ह्यांमध्ये तपास आणि न्यायालयीन प्रक्रिया प्रभावीपणे राबवून दोषींविरुद्ध कठोर कायदेशीर कारवाई केली जात असल्याचे पोलिसांकडून सांगण्यात आले.
