५ डीजे मिक्सर, ३ डीजे कन्सोलसह साहित्य जप्त; पोलिसांची कठोर कारवाई
पिंपरी : गणेशोत्सवाच्या सातव्या दिवशी गणेश विसर्जन मिरवणुकीदरम्यान उच्च क्षमतेचे डीजे व डॉल्बी साऊंड सिस्टीमचा वापर करून ध्वनीप्रदूषण करणाऱ्या गणेश मंडळांवर सांगवी पोलिसांनी कारवाई केली. सांगवी पोलीस ठाण्याच्या हद्दीत झालेल्या या कारवाईत ९ गणेश मंडळांचे अध्यक्ष, डीजे मालक व चालकांविरुद्ध गुन्हे दाखल करण्यात आले असून संबंधित ध्वनिवर्धक यंत्रणा व इतर साहित्य जप्त करण्यात आले आहे.
पोलिसांनी दिलेल्या माहितीनुसार, पिंपरी-चिंचवड पोलीस आयुक्तालयाच्या हद्दीत सण-उत्सवाच्या काळात सार्वजनिक शांतता, कायदा व सुव्यवस्था अबाधित राखण्यासाठी ९ सप्टेंबर २०२६ रोजी रात्री १ वाजल्यापासून २६ सप्टेंबर २०२६ रोजी रात्री १२ वाजेपर्यंत सार्वजनिक ठिकाणी उच्च क्षमतेचे डीजे, डॉल्बी साऊंड सिस्टीम तसेच ध्वनीप्रदूषण करणाऱ्या साधनांच्या वापरास बंदी घालण्यात आली आहे.
या आदेशाची माहिती गणेश मंडळांचे अध्यक्ष व कार्यकर्त्यांना बैठका घेऊन तसेच लेखी स्वरूपात देण्यात आली होती. त्यानंतरही २० सप्टेंबर रोजी सांगवी पोलीस ठाण्याच्या हद्दीत सातव्या दिवसाच्या गणेश विसर्जन मिरवणुकीदरम्यान एकूण ९० गणेश मंडळांच्या मिरवणुका झाल्या. त्यापैकी ९ ते १० मंडळांकडून उच्च क्षमतेच्या डीजे व डॉल्बी साऊंड सिस्टीमचा वापर होत असल्याचे पोलिसांच्या निदर्शनास आले.
कारवाईदरम्यान पोलिसांनी ५ डीजे मिक्सर, ३ डीजे कन्सोल, १ लाईट कंट्रोल मशीन, ३ लॅपटॉप, १ स्पीकर तसेच १ डीजे सेट (ट्रॅक्टर, ट्रॉली व स्पीकरसह) असा मुद्देमाल ताब्यात घेतला. संबंधित मंडळांचे पदाधिकारी, डीजे मालक व चालकांविरुद्ध कायदेशीर कारवाई करण्यात आली.
ही कारवाई पोलीस आयुक्त विनयकुमार चौबे, सह पोलीस आयुक्त शशिकांत महावरकर, अपर पोलीस आयुक्त सारंग आवाड व बसवराज तेली, पोलीस उप आयुक्त परिमंडळ-१ संदिप आटोळे आणि सहायक पोलीस आयुक्त सांगवी विभाग मनिषा कदम यांच्या मार्गदर्शनाखाली करण्यात आली.
सांगवी पोलीस ठाण्याचे वरिष्ठ पोलीस निरीक्षक जितेंद्र कोळी, पोलीस निरीक्षक (गुन्हे) नांदेकर, सहायक पोलीस निरीक्षक माळेगावे, पाटील, बोराडे, पोलीस उपनिरीक्षक भालेराव, पाटील, जावळे, आकमवाड, बाराते, कांबळे तसेच परि. महिला पोलीस उपनिरीक्षक जाधव आणि पोलीस अंमलदारांच्या पथकाने ही कारवाई केली.
उल्लंघन करणाऱ्यांवर कठोर कारवाईचा इशारा
गणेशोत्सव २०२६ तसेच आगामी विसर्जन मिरवणुकांमध्ये कोणत्याही गणेश मंडळाने उच्च क्षमतेचे डीजे, डॉल्बी साऊंड सिस्टीम अथवा ध्वनीप्रदूषण करणाऱ्या साधनांचा वापर करू नये. आदेशाचे उल्लंघन करणाऱ्या मंडळांवर कठोर कायदेशीर कारवाई करण्यात येईल, तसेच संबंधित डीजे, डॉल्बी साऊंड सिस्टीम, डीजे मिक्सर व कन्सोल जप्त करण्यात येतील. या कारवाईस संबंधित मंडळाचे पदाधिकारी व आयोजक जबाबदार राहतील, असा इशारा पोलिसांनी दिला आहे.
